«Birgemiz: Taza Álem» jobasy aıasynda volonterlerdi qoldaý ortalyqtary ashyldy
Bul týraly QazAqparat Azamattyq bastamalardy qoldaý ortalyǵynyń baspasóz qyzmetine silteme jasap habarlaıdy.
«Jobany iske asyrýǵa 55 mıllıon 693 myń teńge qarjy bólingen. Onyń maqsaty – azamattardy qorshaǵan ortany qorǵaý, ózender men ormandardy tazartý salasynda volonterler qyzmetine tartý, aǵash otyrǵyzý men qoqysty suryptaýǵa úıretý, ekologııalyq volonterler qozǵalysymen ózara árekettesý», - delingen baspasóz habarlamasynda.
Jobany iske asyrýdaǵy maqsat:
-Azamattardy qorshaǵan ortany qorǵaý, ózender men ormandardy tazartý, aǵash otyrǵyzý men qoqysty suryptaýǵa úıretý;
- Naqty jergilikti mindetterdi sheshýge baǵyttalatyn 300 myń teńgege deıin 68 shaǵyn grant bólý;
-1000-ǵa jýyq azamat pen volonterlerdi tartý jáne oqytý;
-Jastar arasynda eko-volonterlikti keńinen nasıhattaý;
-Kógaldandyrý jumystary boıynsha volonterlik jobalady júzege asyrý;
-Janýarlardy qorǵaý jumystary boıynsha volonterlik jobalar.
«Azamattardy qorshaǵan ortany qorǵaý, ózender men ormandardy tazalaý, aǵash otyrǵyzý, qoqystardy suryptaýǵa úıretý maqsatynda 3 oblysta múddeli uıymdarmen, túrli eko-qozǵalystarmen yntymaqtastyq týraly memorandým jobasy ázirlendi. Qostanaı, Batys Qazaqstan jáne Almaty oblystarynyń jastar resýrstyq ortalyqtarynda volonterlerdi qoldaý ortalyqtary ashyldy», - delingen habarlamada.
Sondaı-aq, joba aıasynda azamattardyń ekologııalyq saýatyn arttyrý maqsatynda «Jer kúni» halyqaralyq merekesiniń 50 jyldyǵyna arnalǵan onlaın aktsııa ótkizildi. Aktsııa barysynda túrli onlaın vebınarlar, sheberlik sabaqtary, vıktorınalar, utys oıyndary jáne ekokvest bolyp ótti.