16:03, 14 Shilde 2020 | GMT +6
«Birgemiz: Úmit» jobasyna volonterlerdi qabyldaý bastaldy
ALMATY. QazAqparat – Qazaqstanda «Birgemiz: Umit» jalpyulttyq jobasyna volonterlerdi qabyldaý bastaldy. Volonterler joǵalǵan adamdardy izdeý, zilzala qaýip-qaterin azaıtý, tabıǵı jáne tehnogendik sıpattaǵy tótenshe jaǵdaılardyń saldaryn joıýǵa kómektespek, dep habarlaıdy QazAqparat tilshisi.
Joba Qazaqstan Respýblıkasy Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KEAQ memlekettik granty sheńberinde iske asyrylady.
16 jastan asqan kez kelgen adam myna baǵyttar boıynsha topqa qosylyp, volonter bola alady:
• adamdardy izdeý,
• shuǵyl medıtsınalyq kómek kórsetý,
• tabıǵı jáne tehnogendik sıpattaǵy tótenshe jaǵdaılardyń saldaryn joıý jáne apat táýekelderin azaıtý jónindegi jobalarǵa qatysý.
«Ujymǵa múshe bolý úshin joba uıymdastyrýshylaryna @league_volunteers Instagram paraqshasyna hat jazyp nemese +7 707 597 3421 nómirine qońyraý shalýǵa bolady» deıdi «Volonterler lıgasy» uıymynyń baspasóz qyzmeti.
