Birgemiz: Qostanaılyq volonterler 4 myń adamǵa dári-dármek jetkizdi

QOSTANAI. QazAqparat – Qostanaı oblysynda volonterlik jobalardyń negizgi baǵyty anyqtaldy. Bul týraly óńirlik kommýnıkatsııalar alańynda ótken brıfıngte oblystyq jastar saıasaty máseleleri jónindegi basqarmanyń basshysy Marat Jurqabaev málim etti, dep habarlaıdy QazAqparat.

El jastary «Volonter jyly» aıasynda negizgi 7 baǵyt boıynsha jobalaryn usynady. Olar: «Sabaqtastyq», «Densaýlyq», «Taza álem», «Asyl mura», «Qamqor», «Bilim» jáne «Úmit».

«Atalǵan baǵyttardyń ishinen Qostanaı oblysy óziniń volonterlik qyzmetin «Taza álem» baǵytyna arnaıtyn bolady. Bul – qorshaǵan ortany qorǵaýǵa, ózender men ormandardy tazalaýǵa, aǵash otyrǵyzýǵa jáne qoqysty suryptaýǵa úıretýge baǵyttalǵan joba. Bizdiń jastar «Volonter jyly» aıasynda is-sharalardy júzege asyrý boıynsha jyl basynan beri 235 is-shara ótkizdi. Oǵan 10422 adam qatysty. Ásirese, jalǵyz turatyn qarttarǵa turmystyq kómek kórsetýge, turǵyn úı aýmaǵyn qardan tazartýǵa, «Birgemiz» respýblıkalyq aktsııasy aıasynda muqtaj jandarǵa azyq-túlik jetkizý kezinde jaqsy jumys atqardy», – dedi Marat Jurqabaev.

Óńirde volonterlik qozǵalysty nasıhattaý men damytýdy júzege asyratyn respýblıkalyq front-keńse ashylǵan bolatyn. Jalpy, oblysta shamamen 15 myń adamdy biriktirgen 90 volonter uıymy jumys isteıdi.

«Jastarymyz «Birgemiz» respýblıkalyq aktsııasy sheńberinde belsendi boldy. Qostanaı qalasyndaǵy 5 emhanamen birlesip jumys isteldi. Barlyǵy 4 myńnan astam adamǵa dári-dármek tasymaldandy. Sonymen qatar volonterlik uıymdar respýblıkalyq «Halyq» qory aktsııasyna da qatysýda. Budan bólek volonterlerimiz «Jasyl el» baǵdarlamasyn da qoldap otyr. Baǵdarlama aıasynda 76 mln teńge ıgeriledi. Abattandyrý sharalaryna 1047 adam qatysady. Kadr jaǵynan da, qarjy jaǵynan da ár aýdanǵa tıisti qarajat bólindi», - deıdi basqarma basshysy.