«Birgemiz» qorynan 5 mlrd teńge aımaqtarǵa aýdaryldy

NUR-SULTAN. QazAqparat - Ataýly kómek qarajaty óńirlerge 100% aýdaryldy, dep habarlaıdy QazAqparat tilshisi.

«Nur Otan» partııasy baspasóz qyzmetiniń habarlaýynsha, qazirdiń ózinde eldiń áleýmettik osal toptaryna bir rettik kómek kórsetý úshin «Birgemiz» qorynan 5 mıllıardtan astam teńge elimizdiń aımaqtaryna jiberildi.

Qor basshylyǵy aptanyń aıaǵyna deıin barlyq qarajatty bólý týraly naqty mindet qoıdy. Partııanyń jiti baqylaýymen ákimdikter qarajatty alýshylardyń tizimderin jasap úlgerdi. Tólemder muqtaj jandardyń banktik kartalaryna avtomatty túrde túsedi, operatsııa nátıjesi boıynsha bank somanyń eseptelgendigi týraly SMS habarlama jiberedi.

Materıaldyq kómek myna 7 sanattaǵy azamattardy qamtıdy, olar: az qamtylǵan kópbalaly otbasylar, muqtaj múgedekter, múgedek balany tárbıelep otyrǵan otbasylar, zeınetkerler, eń tómengi zeınetaqy alatyndar jáne halyqtyń áleýmettik osal toptarynyń tizimine enetinder, jetim balalar (jetim balalar jáne asyraýshysynyń birin joǵaltqan balalar), Uly Otan soǵysynyń ardagerleri jáne olarǵa teńestirilgen múgedekter, sondaı-aq tyl eńbekkerleri.

Sondaı-aq, qor esebinen Túrkistan oblysy Maqtaaral aýdanyndaǵy Myrzakent aýylynda 20 úıdiń qurylysy aıaqtaldy. 12 úıdiń qurylysy áli jalǵasýda.