Birgemiz: Aqmola oblysynda muqtaj jandarǵa azyq-túlik jetkizilip jatyr

KÓKShETAÝ. QazAqparat – Aqmola oblysynda Nur Otan partııasynyń belsendileri Birgemiz aktsııasy barysynda muqtaj jandarǵa azyq-túlik jetkizip jatyr, dep habarlaıdy QazAqparat tilshisi partııanyń oblystyq fılıalyna silteme jasap.

Qıyn ýaqytta óńirde muqtaj jandarǵa kómek qolyn sozýda belsendilik tanytyp júrgen jandardyń biri - Nur Otan partııasy Aqmola oblystyq fılıalynyń múshesi, Qazaqstan halqy Aqmola assambleıasynyń «Sangı-Kabýd» tájik ulttyq-mádenı ortalyǵynyń tóraǵasy Ýmar Shonazarov. Ol 40 azyq-túlik sebetin daıyndap, muqtaj jandarǵa berý úshin partııanyń oblystyq fılıalyna tapsyrdy.

Sonymen qatar, ol soǵys ardagerleri, jalǵyz basty qarııalarǵa dári-dármek, azyq-túlik jáne antıseptıkter satyp ápergen.

«Óziń kómek kórsetken adamnyń qýanýy, seni de qýantady», - deıdi Ýmar Shonazarov.

On jyl buryn Reseıden tarıhı otany Qazaqstanǵa kóship kelgen Japash Shákenov aǵamyz qolynda І toptaǵy múgedek qyzymen birge jaldamaly páterde turyp jatyr. Búgin bastaýysh partııa uıymynyń múshesi, Kókshetaý qalalyq máslıhatynyń depýtaty Roza Arystanqyzy jáne belsendi partııa múshesi Ýmar Shonazarov jalǵyzbasty qarııanyń úıine baryp, eń qajetti azyq-túlik pen antıseptık quraldar jetkizdi.

Japash aqsaqal І toptaǵy qyzy úshin Birgemiz Akmola qoǵamdyq qorynan qıyn jaǵdaıda qalǵan otbasylar úshin berilgen 50 myń teńge qarjylaı kómek aldy. Elde tótenshe jaǵdaıdyń jarııalanýyna baılanysty, muqtaj otbasylarǵa Elbasynyń bastamasymen Birgemiz qoǵamdyq qory tarapynan berilgen qarjylaı kómekke dán rıza.

Sonymen qatar, osy qaıyrymdylyq sharasy kezinde tórt bala tárbıelep otyrǵan Kókshetaý qalasynyń turǵyny Ekaterına Anışenkoǵa azyq-túlik sebeti jetkizildi jáne 50 myń teńge kóleminde kómek kórsetildi.