#Birge #TazaQazaqstan: Tarazda 61,8 shaqyrym jaǵajaıdan 258 tonna qoqys shyǵaryldy
TARAZ. QazAqparat – Jambyldyqtar jalpy respýblıkalyq sıpat alǵan #Birge #TazaQazaqstan ekologııalyq aktsııasynan shet qalmady, dep habarlaıdy QazAqparat.
Bir juma buryn Ekologııa, geologııa jáne tabıǵı resýrstar mınıstri Maǵzum Myrzaǵalıevtiń bastamasynan qolǵa alynǵan aktsııanyń negizgi maqsaty — sý aıdyndaryn kúl qoqystan tazartý.
Senbilik oblys ortalyǵy Taraz qalasynyń aýmaǵyndaǵy «Qarasý – 1», «Qarasý - 2», «Túıte», «Tóregeldi», «Bazarbaı», «Úshbulaq», «Seńkibaı», «Ońtústik qurǵatý drenajdy», «Taıvan», drenajdy kanalardyń boıy, «Talas» ózeni jáne «Aqbulaq», «Qarataý» móltek aýdandaryndaǵy kanaldardyń jaǵajaılarynda uıymdastyryldy. Barlyǵy 21 nysan tazartyldy.
Sharaǵa oblys ákiminiń mindetin atqarýshy Nurjan Kalenderov bastaǵan oblys ákimi apparatynyń jáne barlyq memlekettik mekemelerdiń, ónerkásip oryndarynyń qyzmetkerleri men túrli sala mamandary bir kisideı atalǵan sharaǵa qatysty.
«Búginde barshamyz bir kisideı osy kanaldar men ózenderdiń mańaıyn tazartýǵa jumylyp otyrmyz. Buǵan qala turǵyndary da óz belsendilikterin tanytýda. Bul bastama tek qala aýmaǵynda jáne oblystyń barlyq 10 aýdanynda júzege asyp jatyr. Aýyldyq eldi-mekenderdegi ózender men kanaldardyń, tipti qamys basqan aryq-atyzdardyń da aýmaqtary tazalanýda. Bul shara ataýyna sáıkes eldi birigip eńbek etýge, aınalany taza ustaýǵa úndeıdi», – degen Nurjan Kalenderov ekologııalyq aktsııanyń mańyzdylyǵyn atap ótip, oblys turǵyndaryn jaǵajaılar men sý aıdyndarynyń aýmaǵyn taza ustaýǵa shaqyrdy.
Aıta ketý kerek, Taraz qalasy boıynsha júrgizilgen senbilikke 4535 adam qatysyp, 47 tehnıka jumyldyryldy. Jalpy qala aýmaǵynda 61,8 shaqyrym kanaldardyń boıy tazartylyp, 258 tonna kúl-qoqys shyǵaryldy.
