#Birge #TazaQazaqstan: Qaraǵandy oblysynda Nura, Esil, Jaman Sarysý ózenderi tazalandy
NUR-SULTAN. QazAqparat - Qaraǵandy oblysynda «Birge-Taza Qazaqstan!» ekologııalyq aktsııasy jalǵasýda, dep habarlaıdy oblystyq ákimdiktiń baspasóz qyzmeti.
Ekinshi apta qatarynan Qaraǵandy oblysynyń turǵyndary «Birge-Taza Qazaqstan!» aktsııasyna qatysýda. 3 tamyzda aýqymdy ekologııalyq senbilikke aımaqtyń barlyq qalalary men aýdandarynda 33 myńǵa jýyq adam shyqty.
Qatysýshylar arasynda kásipkerler, eriktiler, ekologııalyq belsendiler jáne qala turǵyndary boldy.
Keńgir sý qoımasynyń jaǵalaýy qoqystan tazartyldy. Sonymen qatar, senbilik Balqash, Nura, Esil, Jaman Sarysý ózenderi men sý qoımalarynda ótti. Aktsııaǵa qatysýshylar Saran sý qoımasynda jáne Balqash qalasyndaǵy Shyǵys ónerkásip aımaǵynda, Qylysh sý qoımasynda, Sátbaev qalasyndaǵy QTQ polıgonynda qoqystar jınady. Sondaı-aq saıabaqtarda, gúlzarlarda jáne qalalar men aýyldardyń bas kóshelerinde tazalyq sharasy júrgizildi.
Oblys ortalyǵynda osy senbide «Birge - taza Qazaqstan!» atty aktsııasyn 3000-nan astam turǵyn qoldady. DSK mańyndaǵy 15-magıstral men Saran tas jolynyń boıynda aktsııaǵa qatysýshylar turmystyq qoqystardy alyp tastady. Tazartý jumystary Ortalyq saıabaqtyń aýmaǵynda da júrgizildi. Sonymen qatar Gapeev kóshesinde garaj alańy men Nesterov kóshesinde zańsyz qoqys tastaıtyn jerler joıyldy. Kishi jáne úlken Buqpa ózenderiniń arnasy jáne qala shegindegi orman otyrǵyzý aýmaǵy tazartyldy.
Polıgonǵa 3 000 tonna qoqys shyǵaryldy.
