#Birge #TazaQazaqstan: Elordalyqtar Maıbalyq kólin tazalaýda
NUR-SULTAN. QazAqparat- #Birge #TazaQazagstan respýblıkalyq ekologııalyq aktsııasy aıasynda elordalyqtar Maıbalyq kóliniń jaǵalaýyn tazartýda, dep habarlaıdy QazAqparat tilshisi.
«Búgin mine osymen úshinshi apta taza Qazaqstan ekologııalyq aktsııasyn jalǵastyryp jatyrmyz. Maıbalyq kóli qala mańynda ornalasqandyqtan adamdar munda demalýǵa jıi keledi. Tıisinshe qaldyqta kóp. Olaı bolsa bárimiz birigip, tazalyq jumysyna kiriseıik», - dedi qala ákimi Altaı Kólginov.
Tazalyq sharasyna 1 myńnan astam elordalyq qatysýda. Onyń ishinde birqatar memlekettik vedomstvo basshylary men qyzmetkerleri, qoǵam qaıratkerleri, sondaı-aq qala turǵyndary men eriktiler bar.
Eske sala ketsek, ótken aptada atalǵan aktsııa aıasynda astanalyqtar Esil jáne Qarasý ózenderiniń jaǵalaýyn tazalap, 16 tonna qaldyq jınalǵan bolatyn.
