#Birge #TazaQazaqstan: Elordada ekologııalyq aktsııaǵa qatysqandar 16 tonnadan astam qaldyq jınady
NUR-SULTAN. QazAqparat – Ekologııalyq aktsııa barysynda Esil jáne Qarasý ózenderiniń jaǵalaýy qoqystan tazartyldy, dep habarlaıdy QazAqparat tilshisi.
Bas qaladaǵy tazalyq aktsııasyna 5 myńnan astam elordalyq qatysyp, 16 tonnadan astam qoqys jınaldy. Onyń ishinde memleket qaıratkerleri, qoǵam belsendileri, jastar men eriktiler toby bar. Senbilik qatysýshylary qala irgesindegi Esil, Qarasý ózenderi men Maıbalyq kóli jáne Vıacheslav sý qoımasynyń mańaıyn tazartty.
«Demalys kúnine qaramastan, kóptegen qala turǵyndary belsendilik tanytyp qatysty. Búgingi tazalyq sharasyna qatysqan árbir azamatqa alǵys bilderemiz. Biz tabıǵatta demalýdy unatamyz, demek tabıǵatty taza ustap, ekologııaǵa jaýapty bolýymyz kerek. Tazalyq ár adamnyń ózinen bastalady», - dedi qala ákimi Altaı Kólginov.
Sonymen qatar, qala basshysy atalǵan ekologııalyq aktsııanyń turaqty túrde jalǵasyn tabatynyn aıtyp ótti.
Sondaı-aq, atalǵan tazalyq sharasyna Úkimet basshysy Asqar Mamın bastaǵan, Úkimet músheleri men qatar birqatar mınıstrler qatysty.
Buǵan deıin habarlaǵanymyzdaı, qala ákiminiń orynbasary Baqtııar Máken qala mańyndaǵy adamdar demalatyn ózen-kólder jaǵalaýyna qoqys konteınerleri qoıylatynyn aıtqan bolatyn.
