#Birge #TazaQazaqstan: Aldaǵy aptada Nura ózenin tazalaımyz – Baqtııar Máken
NUR-SULTAN. QazAqparat – Elorda ákiminiń orynbasary Baqtııar Mákenniń aıtýynsha, #Birge #TazaQazaqstan aktsııasyn ótkizýdiń maqsaty astanalyqtardy tazalyqqa shaqyrý, dep habarlaıdy QazAqparat tilshisi.
«Prezıdent bastap, Úkimet basshysy qoldaǵan bul aktsııanyń biz úshin jáne tabıǵat úshin mańyzy zor. Sebebi, aldymen ózen-kólder qaldyqtardan tazartylsa, ekinshiden bul shara adamdardy ekologııalyq mádenıetke shaqyrýdyń birden bir quraly. Mine, osymen úshinshi apta uıymdastyrylǵan tazalyq sharasyna astanalyqtar belsene qatysýda. Ekologııalyq aktsııany kúzge deıin, ıaǵnı kún sýytqansha jalǵastyratyn bolamyz. Aldaǵy demalysta Nura ózeniniń jaǵalaýyn tazalaý josparda tur», - dedi Baqtııar Máken.
Ótken aptadaǵy #Birge #TazaQazaqstan ekologııalyq aktsııasy kezinde ákimniń orynbasary elorda mańyndaǵy ózenderdiń boıyna qoqys konteınerleri qoıylatynyn aıtqan bolatyn.
Aıta keteıik, búgin shahar basshysy Altaı Kólginovtiń qatysýymen astanalyqtar Maıbalyq kóliniń jaǵalaýyn tazartty.
