#Birge aktsııasy aıasynda bilim salasyna qatysty birqatar usynys tústi

NUR-SULTAN. QazAqparat - Prezıdenttikke úmitker Qasym-Jomart Toqaevtyń saılaýaldy shtaby uıymdastyrǵan #Birge aktsııasy aıasynda saılaýshylardan birqatar usynystar kelip tústi. Sonyń bir bóligi bilim salasyna qatysty, dep habarlaıdy kandıdattyń baspasóz qyzmeti.

Azamattar #Birge aktsııasyna ún qosyp, bilim salasyna qatysty ótinish-tilekterin jetkizdi. Halyqty bilim sapasy, úsh aýysymdy mektepter, joǵary bilimniń qoljetimdiligi, stýdentter stıpendııasyn arttyrý, sondaı-aq muǵalimder mártebesi týraly máseleler tolǵandyrady.

Máselen, Nur-Sultan qalasynyń turǵyny mektepterdegi bilim sapasyna jáne oryn jetkiliksizdigine nazar aýdarylǵanyn qalaıdy. Onyń aıtýynsha, mektepterdiń birinshi synybynda oryn joq, ásirese qalanyń sol jaǵalaýyndaǵy keı mektepterde oqýshylar lyq toly.

Bilim salasy qyzmetkerlerinen de usynystar túsip jatyr. Almaty oblysy Talǵar aýdanynyń turǵyny mektep muǵalimderi men joǵary oqý oryndarynyń oqytýshylaryn qaǵazbastylyqtan bosatyp, mektep jumysyna tsıfrlyq formatty engizýdi suraıdy. Al, Almaty oblysy Panfılov aýdanynan usynys joldaǵan ustazdardyń biri mektepte aqsha jınaýdy toqtatyp, muǵalimderdi qajetsiz júktemeden bosatýdy, pedagogıkalyq mamandyqtarǵa túsetin talapkerlerge qoıylatyn talaptardy arttyrýdy jáne barlyq muǵalimderge laıyqty eńbekaqy tóleýdi usynady.

Aıta keteıik, #Birge aktsııasy arqyly joldanǵan barlyq usynystar men tilekterdi shtab músheleri qarap, ishindegi eń konstrýktıvtisi kandıdat baǵdarlamasyna engiziledi.