«BIRGE» aktsııasy arqyly Toqaevtyń saılaýaldy baǵdarlamasyna usynys berýge bolady

NUR-SULTAN. QazAqparat - Búgin elimiz boıynsha Qazaqstan Prezıdenttigine kandıdat Qasym-Jomart Toqaevtyń saılaýaldy baǵdarlamasyna usynystar men tyń ıdeıalar jınaý úshin «BIRGE» jalpyulttyq aktsııasy óz jumysyn bastady. Bul týraly Nur Otan partııasy tóraǵasynyń birinshi orynbasary Máýlen Áshimbaev Facebook paraqshasynda jazdy, dep habarlaıdy QazAqparat.

Aktsııa aıasynda elimizdiń ár azamaty jergilikti jerdegi qoǵamdyq shtabtarǵa kelip óz pikirlerin bildirip, damýdyń jańa kezeńinde Qazaqstannyń aldynda turǵan basym baǵyttardy aıqyndaýǵa tikeleı qatysa alady.

«Bul - ár qazaqstandyqqa elimizdiń kún tártibin qalyptastyrýǵa úles qosý úshin berilip otyrǵan úlken múmkindik. Sondyqtan árqaısyńyzdy erteńgi kúnimizge beıjaı qaramaı, tyń bastamaǵa belsendi túrde qatysýǵa shaqyramyn. Elimizdiń kemel keleshegin #BIRGE jasaıyq», - dep jazdy Máýlen Áshimbaev.