Birǵanym Áıtimova mekteptegi tamaqtandyrý týraly: 100 teńgege ne ázirleýge bolady
ASTANA. QazAqparat - Búgin Senattyń jalpy otyrysynda depýtat Birǵanym Áıtimova orta mektepterde oqýshylardy tamaqtandyrýdaǵy kemshilikterdi atady, dep habarlaıdy QazAqparat.
«Apta saıyn saıttarda, merzimdi baspasóz basylymdarynda birqatar óńirlerdiń jekelegen mektepterinde oqýshylardyń taǵamnan ýlanyp jatqany týraly aqparat shyǵyp turady. Keıde ýlanǵan oqýshylardyń sany 20-ǵa jetip jatady. Osyǵan oraı mekteptegi tamaqtandyrýda keshendi máselelerdi sheshý qajetti týraly Premer-Mınıstrdiń atyna depýtattyq saýal ázirlendi», - dep toqtaldy senator.
Onyń sózine qaraǵanda, Dúnıejúzilik densaýlyq saqtaý uıymynyń derekteri boıynsha densaýlyq kórsetkishiniń negizgi talaptarynyń biri - ol tamaqtanýǵa qatysty. Oqýshylardyń tamaqtanýy tıimdi ári paıdaly bolýy tıis, óıtkeni bul ýaqytta aǵzanyń qalyptasýy protsesi júredi.
«Bilim týraly» Zańǵa sáıkes, bilim berý salasyndaǵy jergilikti atqarýshy organ bilim alýshylardyń jekelegen sanattaryn tegin jáne jeńildikpen tamaqtandyrýdy uıymdastyrady. Qalǵan balalardy ata-analary aqyly túrde tamaqtandyrady. Ótkinishke qaraı, sońǵy kezde jeke kásipkerler qyzmet kórsetetin birqatar mektep ashanalarynda as máziri talaptarǵa saı kele bermeıdi, taǵamdar tehnologııalardan aýytqýmen ázirlenedi. Sonymen qatar esepten jeý jáne kem ólsheý jaǵdaılary kezdesedi. Mekteptegi tamaqtandyrýdy uıymdastyrýshy osy salada jumys tájirıbesin jınaýǵa da úlgermeı jatyp, jyl saıyn aýysady. Tenderler ótkizý kezinde birqatar oblystarda jergilikti bilim berý basqarmalary taǵam qunynyń bir oqýshyǵa sanaǵanda tek qana 100 teńgeden aspaýyn talap etedi. 100 teńgege ne ázirleýge bolady? Osynyń saldarynan elimiz boıynsha mektep ashanalarynda oqýshylardyń sapasyz taǵamnan ýlanýy kóbeıe tústi», - dep atap ótti Birǵanym Áıtimova.
Osy oraıda ókiletti organdarmen birlesip, jappaı bastaýysh synyptardyń oqýshylaryn ystyq taǵammen qamtamasyz etý boıynsha is-sharalar keshenin ázirlep, olardy iske asyrý usynyldy. Budan bólek, bilim berý uıymdarynda tamaqtandyrýdy uıymdastyrý turǵysynda qyzmet kórsetý týraly sharttardyń qoldanylýy merzimin bir jyldan úsh jylǵa deıin uzartý máselesi kóterildi.
«Memlekettik-jekeshelik áriptestik aıasynda mekteptegi tamaqtandyrý kombınattaryn qurý múmkindigin qaraý usynylady. Sonymen birge, bul máselege mekteptegi tamaqtandyrýdy ortalyqtandyrylǵan basqarý sııaqty jańa ınstıtýtty engizý jaǵynan qaraý qajet», - dep túıdi depýtat.
Foto: sibdepo.ru
