Birǵanym Áıtimova: Qasym-Jomart Toqaev - jumysyna da, sheshimderine de berik adam
«Menińshe, basqa kandıdattarǵa qıyndaý bolady. Sebebi Qasym-Jomart Toqaev - óz jumysyna da, sheshimderine de berik adam. Sosyn óte jaýapty ári saýatty. Barlyq salalardy jaqsy biledi. Halyqaralyq deńgeıde de solaı. Birikken Ulttar Uıymynda jumys istegende ózin kásibı menedjer retinde kórsete bildi. Atalǵan uıymnyń Jenevadaǵy bólimshesin jańǵyrtýǵa úlken úles qosty. Sol sebepti ony «relable» (senimdi adam - avt.) retinde moıyndady. Ol kez kelgen baǵdarlamany basqarýdy ǵana emes, ony iske asyrý tetikterin de biledi», - dedi B.Áıtimova jýrnalısterge bergen suhbatynda.
Senator «Nur Otan» partııasynyń atynan prezıdent saılaýyna Qasym-Jomart Toqaevtyń kandıdatýrasy usynylatynyn ishteı joramaldaǵan. Sol sebepti sezde esh irkilmeı, kandıdat úshin daýys berdi.
«Elbasy Nursultan Nazarbaevty álem boıynsha moıyndaıdy. Ol Qasym-Jomart Toqaevty prezıdenttikke usynsa, oǵan senýge ábden bolady. Sosyn men ózim Toqaev myrzanyń qaramaǵynda jumys istedim jáne ony adam retinde jaqsy bilemin. Máselen, búgin Qasym-Jomart Toqaev adaldyq pen ádeptilik týraly aıtty. Ol - ózi de sondaı adam. Ony senimdi túrde aıta alamyn», - dep atap kórsetti B.Áıtimova.
Aıta keteıik, búgin Elbasy «Nur Otan» partııasynan QR Prezıdenttigine úmitker retinde Qasym-Jomart Toqaevtyń kandıdatýrasyn usyndy. Al partııa tóraǵasy Nursultan Nazarbaev kandıdatty qoldaýǵa qatysty birqatar tapsyrmalar berdi. «Nur Otan» sezi Qasym-Jomart Toqaevtyń kandıdatýrasyn biraýyzdan bekitti.
