Bireýge ókpelegen bolýy múmkin: Almatyda 15 jasar bala tabylmaı jatyr
ALMATY. QazAqparat - Almatyda iz-túzsiz ketken 15 jastaǵy ınternat tərbıelenýshisin izdeýge polıtsııa, eriktiler, ınternat qyzmetkerleri atsalysyp jatyr, dep habarlaıdy QazAqparat tilshisi.
Damır Serikuly N.Ostrovskıı atyndaǵy zaǵıp jáne kózi nashar kóretin balalarǵa arnalǵan №4 mektep-ınternatynan 12 jeltoqsanda ketip qalǵan. Keteriniń aldynda hat jazyp, anasyna qaldyryp ketken.
«Tańerteń tańǵy asqa barýdan bas tartty. Eshkimge eskertpesten ketip qalǵan. Biraq hat jazyp ketken. Ony bizge anasy kórsetti. Hatynda jasóspirim onymen eshkim sóılespeıtinin, barlyǵy teris aınalatynyn aıtyp shaǵymdanǵan. Bul hat ınternattan tabylmady. Bizde ondaı bolýy múmkin emes. Ol ınternatta qonyp júrgen. Balalardyń barlyǵy Damırmen birge oınap, sabaqta sóılesip otyratyndaryn aıtty. Olarmen sóılestik. Múmkin bireýge renjigen shyǵar. Biz eskertpeı ketip qalady dep oılamadyq. Oǵan eshkim qysym kórsetken joq. Ózimiz de ań-tań boldyq. Internat ujymy ony kútip otyr. Polıtsııaǵa aryzdandyq. Qazir barlyq izdestirý toby Damır barýy múmkin jerlerdi aralap júr»,- dedi ınternat dırektorynyń oqý isi jónindegi orynbasary Baqytgúl Jumadilova.
Almaty qalalyq bilim basqarmasynyń məlimetinshe, izdestirý jumystaryna eki top jumyldyryldy. Ərqaısysynda 40-50 adam bar.
«Internat qyzmetkerleri kezekpen təýlik boıy jumys istep jatyr. Barlyq bazarlar, kompıýterlik klýbtar, 1-2 vokzaldar, Saıran avtovokzaly, saýda oryndary túgel tintildi»,- dedi bilim basqarmasynan.
