«Birde-bir zań memlekettik tilde jazylǵan joq» - respýblıkalyq basylymdarǵa sholý
***
Jegenin jep jáne jemtigine ilingeniniń bárin elden asyrǵan eks-bankır men onyń sybaılastarynyń salǵan soıqanynyń saldary sumdyq. Alaıda, kezinde BTA Bankten shyǵarylǵan aktıvterdi qashyp barǵan elinde satýǵa tyrysqan Ábilázovtiń joly bolmady. Álemniń qaı túkpirinde júrse de adam úshin, aldymen, tazalyq, adaldyq, ádildik pen adamgershilik qundylyqtary joǵary turatynyn kez kelgen eldiń zańy kórsetip berdi. Bul jaǵynan alǵanda, ata-babamyz «urlyq túbi - qorlyq» dep baıaǵyda aıtyp qoıǵan. Muny Ábilázov óz isimen dáleldep berdi. Endi London soty ony 22 aıǵa bas bostandyǵynan aıyrdy. Sóıtip, sonaý Tumandy Albıon jaǵalaýy da qazaqstandyq qashqyn olıgarhtyń nıeti shyn máninde buzyq ekenin ańǵardy. Sonymen qashqyn olıgarhtyń elimizde jasaǵan qylmystary jaıynda egjeı-tegjeıli aqparat alǵyńyz kelse, «Egemen Qazaqstan» gazetiniń senbilik sanyndaǵy «Sybaılastar soıqanynyń saldary» degen taqyryptaǵy maqalaǵa kóz júgirtińiz.
Keshe elorda jurtshylyǵy Beıbitshilik jáne kelisim saraıynda ótken «2012-Astana - túrki áleminiń mádenı astanasy jyly» rásimin tamashalady. Bul shara búkil túrki dúnıesinen 220-ǵa tarta adam qatysqan aıtýly joba retinde este qaldy. Alys-jaqyn aımaqtan kelgen 150-den asa ónerpaz sahna tórinde dostyq pen týystyq sherýine qatysyp, ulttyq naqyshtaǵy alýan boıaý jarasymdy órnek tókti. Osy oraıda «Egemen Qazaqstan» gazeti elordany túrki áleminiń mádenı astanasy etý barysynda osy jyly qandaı sharalar ótedi, jas astanamyzdyń ósip-órkendeýine munyń tıgizer paıdasy qandaı degen suraqtarǵa TÚRKSOI-dyń Bas hatshysy Dúısen Qaseıinovtiń áńgimesinen jaýap izdegen. Suhbat «Túrki álemi túgel bol» degen taqyryppen berilgen.
***
«Táýelsizdiginiń 20 jyldyǵyn toılaǵan Qazaqstanda birde-bir zań qazaq tilinde jazylǵan joq! Muny keshe Prezıdent janyndaǵy Memlekettik basqarý akademııasynda ótken «Qazaqstandaǵy memlekettik qyzmet: tilderdiń damý máseleleri» atty dóńgelek ústelde Májilis depýtaty Orazgúl Asanǵazy aıtty. Aşy da bolsa, aqıqat», - dep jazady «Aıqyn» gazeti búgingi sanyndaǵy «Birde-bir zań memlekettik tilde jazylǵan joq» degen taqyryptaǵy maqalasynda. Parlamentke kelgen mınıstrler depýtattar qazaqsha suraq qoıyp jatsa, esh qymsynbastan oryssha jaýap bere beretinin synǵa alǵan depýtat: «Keshirińiz de demeıdi, al bizdiń Ákimshilik kodekstiń 81-baby boıynsha, qazaq tilinde sóılegen adamǵa oryssha jaýap bergen adamǵa aıyppul salynady. Endi biz olardy sotqa berip otyrǵan joqpyz ǵoı. Ar soty jetispeı tur. Qysqasy, til qajettilikke aınalmaǵan jaǵdaıda, on dóńgelek ústel ótkizseńiz de, odan paıda joq», - deıdi.
Alty qyrdyń astynan Olımpıada oıyndarynyń dúbiri estildi. Ústimizdegi jyldyń shilde aıynda Londonda alaýy tutanatyn ǵalamdyq dodaǵa Qazaqstannyń da sportshylary qatysady. Respýblıkamyzdaǵy talaı sport túriniń ókilderi uly dúrmekte sheberlik baıqasýǵa bel býǵanymen, júzden júırikter bas qosqan jarysta «medal alady-aý» degenderi sanaýly ǵana. Solardyń biri jáne biregeıi - grek-rım men erkin kúres sheberleri. Tumandy Albıon elinde beldesetin balýandardyń qaısysy júlde alýy múmkin? Osy saýal tóńireginde oı órbitken «Aıqyn» gazetiniń maqalasy «Balýandar babynda bolsa Olımpıadada altynnyń syńǵyryn estımiz» degen taqyryppen berilgen.
***
«Keshe Memleket basshysy Nursultan Nazarbaev Prezıdenttiń kómekshisi - Qazaqstan Respýblıkasy Qaýipsizdik Keńesiniń hatshysy Marat Tájındi qabyldady», - dep jazady «Kazahstanskaıa pravda» gazeti. Basylymnyń atap ótýinshe, kezdesý barysynda ulttyq qaýipsizdik salasyndaǵy birqatar máseleler talqylandy. M.Tájın Prezıdentti osy baǵyttaǵy negizgi mindetterdi iske asyrý jóninde qabyldanǵan sharalar týraly, sondaı-aq Qaýipsizdik Keńesiniń 2012 jylǵa arnalǵan jumysyn perspektıvalyq josparlaý jaıly habardar etti.
