Birde-bir óńir jylytý maýsymynda apattarǵa jol bermeýi kerek – Premer-Mınıstr

ASTANA. QazAqparat – QR Premer-Mınıstri Álıhan Smaıylov jylytý kezeńine daıyndyq boıynsha ortalyq memlekettik organdarǵa birqatar tapsyrma berdi, dep habarlaıdy QazAqparat tilshisi.

Onyń aıtýynsha, qazir ortalyq jáne jergilikti atqarýshy organdar kommýnaldyq sektorda aýqymdy jumystar júrgizýde.

«Birde-bir óńir jylytý maýsymynda apattarǵa jol bermeýi tıis. Ásirese, bul qurylys maýsymy qysqa jáne jylytý maýsymy erte bastalatyn soltústik oblystar úshin ózekti. Jóndeý jumystary naqty bekitilgen kestelerge sáıkes júrgizilýi tıis. Bıyl shamamen 6 myń shaqyrym ınjenerlik jeliler jóndeletin bolady. Bul – birinshi kezekte jańartýdy qajet etetin, ábden tozyǵy jetken ınfraqurylym obektileri», - dedi Premer-Mınıstr Úkimet otyrysynda.

Sonymen birge, 25 myń shaqyrymnan astam qaraýsyz jatqan kommýnaldyq jeliler monopolısterge beriletin bolady. Olar osy jelilerdi retke keltirýi kerek.

«Atalǵan ózgeristerdiń bárin azamattar sezinýi tıis. Osyǵan baılanysty myna máselelerge nazar aýdarǵym keledi. Birinshi, Qarjy mınıstrligi Qarjylyq monıtorıng agenttigimen birlesip, kommýnaldyq kásiporyndar men stantsııalardyń ınvestıtsııalyq baǵdarlamalardy tıisti túrde oryndaýyn baqylaýy kerek. Ekinshi, Ekonomıka, Energetıka jáne Indýstrııa mınıstrlikteri tarıfterdiń negizsiz ósýine jol bermeı, tutynýshylardyń quqyqtaryn qorǵaýdy qamtamasyz etýi tıis», - dedi Á. Smaıylov.

Úshinshi, Ekonomıka, Energetıka jáne Indýstrııa mınıstrlikteri ákimdiktermen birlesip, qyrkúıektiń sońyna deıin barlyq kommýnaldyq ınfraqurylymdaǵy jóndeý jumystaryn aıaqtaýy kerek.

Tórtinshi, Ekonomıka, Indýstrııa jáne Energetıka mınıstrlikteri ákimdiktermen birlesip, qaraýsyz jatqan kommýnaldyq jelilerdi monopolısterdiń menshigine berý jónindegi Jol kartasyn ázirleýi qajet.

«Besinshi, ákimdikter kommýnaldyq kásiporyndarmen birlesip, 1 qazanǵa deıin kelesi jylǵa arnalǵan jóndeý jumystaryna qajettilikti aıqyndaýy tıis», - dedi Úkimet basshysy.

Osyǵan deıin Úkimet basshysynyń tarıf máselesinde barlyq múdde eskerilýi kerektigin eskertkenin jazdyq.