Bir jyldan keıin Iran atom bombasyna ıe bolady - AQSh
ASTANA. Tamyzdyń 21-i. QazAqparat - Tegranǵa ıadrolyq materıaldardy atom bombasyna aınaldyrýǵa eń kem degende taǵy bir jyl ýaqyt kerek. AQSh prezıdentiniń ıadrolyq máseleler jónindegi keńesshisi Garı Seımor osyndaı málimdeme jasady, dep habarlaıdy VVS radıostansasy.
Irandyq taraptyń bul málimdemege qatysty kózqarasy ázirge belgisiz. Degenmen, Irannyń Atom energııasy jónindegi uıymynyń basshysy Álı Akbar Salehı osynyń aldyndaǵy málimdemesinde, «Býsher» atom-elektr stansasynyń reaktoryna ıadrolyq otyn jetkizý mindetin Reseıdiń óz moınyna alýyna baılanysty, ýrandy baıytýdy toqtatýǵa shaqyrǵan Aq úıdiń úndeýine Irannyń qulaq asa qoıýy ekitalaı ekenin málim etken edi.
Álı Akbar Salehı myrza Islam Revolıýtsııasynyń kósemi aıatolla Álı Hoseını Hameneıge silteme jasap, ıran halqynyń atomdyq elektr stansalaryn salýǵa jáne eldiń ishki suranysy úshin ıadrolyq otyn óndirýge quqyly ekenin basa atap kórsetti.
Ol sondaı-aq, Irannyń ıadrolyq baǵdarlamany jalǵastyrýyna qatysty taǵy bir dáıek keldirdi. Onyń aıtýynsha, «Býsher» stansasynyń qyzmet merzimi 60 jyldy quraıdy. Qazirgi tańda Iran Reseıden aldaǵy 10 jyl boıy ǵana otyn ala alady. Osy sebepti Iran ókimeti qalǵan ýaqyttyń resýrsy stansanyń jumysyna jetkiliksiz bolady dep alańdaýshylyq bildirýde.
Al AQSh pen BUU-nyń Tegranǵa qatysty saıasaty ázirge sanktsııalardy qataıtýmen shektelip otyr. Degenmen, osynyń aldynda ǵana AQSh Shtab basshylary birlesken komıtetiniń basshysy admıral Maık Mallen, AQSh-tyń Iranǵa qarsy áskerı is-qımyldar josparyn ázirlegenin málim etken bolatyn. Biraq ta, admıral Iranǵa shabýyl jasaý - «jaqsy ıdeıa» emes ekenin de aıtyp otyr.
