Bir jylda jarty mıllıon qazaqstandyq baspanaly bolady - Nursultan Nazarbaev
Prezıdent Qazaqstanda baspana qurylysy esh ýaqytta toqtamaǵanyn jáne sońǵy jyldary tıimdi baǵdarlamalar qabyldanǵanyn tilge tıek etti.
«Ipoteka boıynsha «Turǵyn úı qurylys jınaq banki» tanymal, bul jumystar jalǵasyp keledi. Odan bólek, az qamtylǵan jandarǵa, múgedekterge, ózge de osal toptarǵa arnalǵan nesıelik úıler salyp jatyrmyz. «Nurly jer» boıynsha kóptegen jeke úıler men kópqabatty páterler salýǵa bolady. Sońǵy qabyldanǵan baǵdarlama - 7-20-25. Buǵan deıin baspananyń jarty qunyn bankke tóleý qajet edi. Qazir 20 protsent jetkilikti, stavkasy - 7%. Ulttyq bankte bul kórsetkish - 12,5%. ıAǵnı, qalǵan 5,5% memleket óz moınyna alyp, bankterge óteıdi. Eger páter 10 mln teńgege baǵalansa, 25 jylda aı saıyn 50 myń teńge tólep alýǵa bolady. Bir úıde eki adam jumys istese, 50 myń teńge túk emes», - dedi Prezıdent.
Onyń aıtýynsha, Qazaqstanda bıylǵy baspana aýqymy rekordtyq 12 mln sharshy metrge jetken.
«Jyl saıyn 8-9 mln sharshy metr baspana salyp júr edik. Ótken jyly bul kórsetkish tarıhta bolmaǵan 11 mln sharshy metrdi qurady. Bıyl 12 mln sharshy metr bolady. Bul - 100 myń páterge jýyq. Otbasynda shamamen 4 adam bolsa, ata-áje, týystardy qosqanda, jylyna shamamen jarty mıllıon turǵyn jańa, yńǵaıly baspanaǵa qol jetkizedi. Bul jumystar áli de jalǵasa beredi», - dep atap ótti Prezıdent.
Nursultan Nazarbaev jeke úı turǵyzýshylar úshin de jer beriletinin jáne memleket kommýnıkatsııa men joldy, jylý men elektr júıesin jetkizip beretinin eske saldy.
«Suranys bar. Árbir otbasy jeke baspanany qalaıdy. Memleket únemi kómektesip kele jatyr. Halyq sany ósken saıyn, bul másele ózekti bolyp qala beredi jáne memleket bul máseleni sheshýge tyrysady», - dedi ol.
