Bir jylda jańa baspana baǵasy qansha paıyzǵa qymbattady

NUR-SULTAN. QazAqparat – Bir jyl ishinde jańa baspananyń quny 19,6, qaıtalama naryqtaǵy tuǵyn úıdiń baǵasy 26,4 paıyzǵa ósken. Al jaldamaly páter quny aı saıyn 0,4 paıyzǵa qymbattap otyr, dep habarlaıdy QazAqparat Energyprom resýrsyna silteme jasap.

Energyprom dereginshe, shilde aıynynyń ózinde jańa páter - 0,5, al bir jylda - 19,6 paıyzǵa qymbattaǵan. Ekinshi naryqtaǵy baspana baǵasy bir aıda - 0,8, bir jyl ishinde - 26,4 paıyzǵa ósken.

Jaldamaly páter baǵasynyń ósimi aıyna - 0,4 paıyzdy qurap otyr. Al ótken jyldan beri bul baǵa - 20,8 protsentke kóterilipti.

Sarapshylardyń pikirinshe, baspana qunynyń qymbattaýyna janama faktorlar áser etip otyr. Máselen, turǵyn úıge qyzmet kórsetý jáne jóndeý sektoryndaǵy qyzmetter bir jylda - 15,3, qurylys materıaldary - 20,5 paıyzǵa ósken. Bul oraıda ımportqa táýeldilik jaǵdaıdy kúrdelendirip otyr.

Páter jaldaýǵa degen suranys ótken jylmen salystyrǵanda bıyl úsh ese artqan. Bul - Reseı men Ýkraınadan kóp kelip jatqan adamdar sanyna baılanysty. Olardyń basym bóligi Almatyda qalsa, keıbiri Reseıge jaqyn ornalasqan qalalarǵa qonystanýda. Atalǵan faktor turǵyn úı naryǵyndaǵy baǵanyń ósýine áser etip otyr.

Sonymen qatar maýsym-shilde aralyǵynda dollar baǵamy kóterilip, bir jylda teńge 11,6 paıyzǵa arzandady. Dollardyń ortasha aılyq ósimi - 7,6 paıyz. Sondyqtan ulttyq valıýtanyń qunsyzdanýy – baspana naryǵyndaǵy baǵaǵa janama áser etýi múmkin.