Bir jylda Telegram-bot arqyly jarty mıllıon qyzmet kórsetilgen
NUR-SULTAN. QazAqparat - Smartfondaǵy Telegram qosymshasy arqyly memlekettik qyzmetter men servısterdi qoljetimdi etken @egovkzbot qyzmetine bir jyl toldy. Osy merzim aralyǵynda atalmysh bot kómegimen 534 myń qyzmet kórsetildi, dep habarlaıdy QazAqparat «Azamattarǵa arnalǵan úkimet» korporatsııasynyń baspasóz qyzmetine silteme jasap.
Qoldanýshylar arasynda tanymal bolǵan telegram-bot 25 túrli memlekettik qyzmet pen servısterdi alýǵa múmkindik beredi. Jıi suralatyn anyqtamalardyń ishinde mekenjaı, sottylyqtyń bar-joǵy, psıhıatrııalyq, narkologııalyq dıspanserdiń anyqtamalary bar. Buǵan qosa, kez kelgen azamat zeınetaqy qoryndaǵy salymy týraly aqparat alyp, óz úıinde tirkelgenderdiń tizimin qaraı alady.
@Egovkzbot-taǵy servıster arqyly dárigerdiń qabyldaýyna jazylyp, boryshkerler tiziminde bar-joǵyn tekserip, bos jumys oryndaryn qaraýǵa bolady.
@Egovkzbot-ty qoldaný úshin azamattar mobıldi azamattar bazasynda tirkelýi tıis. Bul úshin kez kelgen HQO-ǵa júginýge bolady. Aıta keteıik, bir jyl ishinde onlaın qyzmetter botyn paıdalanyp úlgergenderdiń sany 320 myńnan asty.
