Bir jylda medıtsınalyq saqtandyrý qoryna 81 mlrd teńgege jýyq qarjy tústi
ASTANA. QazAqparat - 2018 jyldyń maýsym aıynda 8,7 mlrd teńgeden astam saqtandyrý jarnasy aýdaryldy. Jalpy osy júıe iske qosylǵaly bergi bir jyl ishinde jeke kásipkerler men jumys berýshiler tólegen aýdarym somasy 80,6 mlrd teńgeden asyp jyǵylǵan, dep habarlaıdy QazAqparat Medıtsınalyq saqtandyrý qorynyń baspasóz qyzmetine silteme jasap.
«Qarajattyń 72,1 mlrd teńgesi (89,5% jýyǵy) jumys berýshilerdiń qaramaǵyndaǵy jumyskerleri úshin jasaǵan aýdarymdary bolsa, qalǵan 8,5 mlrd teńge (10,5% jýyǵy) - jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili. Aımaqtyq turǵydan alǵanda, jarna tóleý jaǵynan Almaty jáne Astana qalalary men Qaraǵandy oblysy kósh bastap tur», - delingen baspasóz baıanynda.
Esterińizge sala ketsek, jınaqtalǵan qarjy Ulttyq bankte saqtalady. Elimizdiń bas bankimen qarjyny senimgerlik basqarý týraly kelisim bekitilgen. Túsken qarajat Mindetti áleýmettik medıtsınalyq saqtandyrý paketi sheńberindegi qyzmetter aqysyn tóleýge jumsalady. Qoldanystaǵy zań boıynsha, áleýmettik medıtsınalyq saqtandyrý sheńberinde qyzmet kórsetý 2020 jyldan bastalýy tıis.
