Bir jylda qus eti 28 paıyzǵa qymbattady

NUR-SULTAN. QazAqparat – Bir jylda elimizde qus eti 27,9 paıyzǵa qymbattady, dep habarlaıdy QazAqparat tilshisi.

Energyprom.kz portalynyń málimetinshe, bıyldyń qańtar-shilde aılarynda salqyndatylǵan qus eti 64,2 myń tonnany qurady, bul bir jyl burynǵydan 3,5 paıyzǵa artyq. Sonymen qatar, 75,9 myń tonna muzdatylǵan qus eti óndirildi, bul kórsetkish 2021 jylǵy qańtar-shildemen salystyrǵanda 0,1 paıyzǵa joǵary.

Bul saladaǵy óndiristiń basym bóligi Almaty jáne Aqmola oblystaryna tıesili. Aqmola oblysynda salqyndatylǵan qus etiniń 38,4 paıyzy jáne muzdatylǵan qus etiniń 18,6 paıyzy, Almaty oblysynda salqyndatylǵan ettiń 16,6 paıyzy jáne muzdatylǵan qus etiniń 50,6 paıyzy óndirildi.

Birinshi jartyjyldyq qorytyndysy boıynsha otandyq kompanııalar qus eti men sýbónimderge suranysty 71,1 paıyzǵa qamtamasyz etti. Bir jyl burynǵy kórsetkish 68,9 paıyz boldy. Osy kezeńde óndiris kólemi 4,2 paıyzǵa artty. Bul turǵyda et ımporty 6 paıyzǵa, ıaǵnı 58,7 myń tonnaǵa deıin qysqardy.

Atalǵan kezeńde ishki naryqta ótkizilgen kólem 196,8 myń tonnany qurap, bul bir jyl burynǵydan 5,3 paıyzǵa artyq boldy.

Bıylǵy tamyz aıynyń qorytyndysy boıynsha qus etiniń quny bir jylda 27,9 paıyzǵa qymbattady. Onyń ishinde taýyq 25,9 paıyzǵa, tós eti – 29,3 paıyzǵa, sıraǵy men san eti 29,5 paıyzǵa qymbattady.

Óńirlik turǵyda qus etiniń qymbattaýy boıynsha joǵary kórsetkish (43,8 paıyzǵa) Mańǵystaý, Aqtóbe (37,8 paıyzǵa), Pavlodar (35,2 paıyzǵa) oblystarynda baıqaldy. Al Qaraǵandy oblysynda bul kórsetkish bir jylda 15 paıyzdy qurady.