Bir jylda qansha qazaqstandyqtyń shetelge saıahattap qaıtatyndyǵy belgili boldy

ASTANA. QazAqparat - Bir jyldyń ishinde 10 mıllıonǵa jýyq Qazaqstan azamaty shekara asyp, shet elge saparlap qaıtady. Bul jaıynda Úkimette ótken baspasóz máslıhatynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«Saıahatshylar legine qatysty derekter qyzyqty. Bul oraıda derekkózi retinde Ulttyq qaýipsizdik komıteti Shekara qyzmetiniń málimetteri alynady. Bizge týrızm boıynsha qansha adam keldi, qansha adam ketti degen aqparattar túsedi. Bir jyldyń ishinde elimizge 6,5 mln adam kelse, bizden basqa elderge barǵandardyń sany 9,8, 10 mıllıonǵa jýyq adam», - dedi ol.
Birinshi vıtse-mınıstr tasymaldaý salasyna qatysty qyzyqty derektermen de bólisti.
«2016 jyly túrli kólik quraldarymen 3,7 mlrd tonna júk tasymaldandy. Negizinen taýarlar avtomobıl arqyly tasymaldanady. Al eger jolaýshylar jaıynda aıtar bolsaq, onda biz bir jyldyń ishinde 22 mln jolaýshy tasymaldadyq. Jolaýshylar tasymaly qurylymynda basym úles avtobýstarǵa tıesili», - dedi Dálenov.