Bir jylda balalar attraktsıondarynyń qyzmeti 25% qymbattady

ASTANA. QazAqparat – Osy jyldyń qańtar-sáýirinde óner, kóńil kóterý jáne demalys salasyna salynǵan negizgi ınvestıtsııa kólemi 36,2 mlrd teńgeni qurady, dep habarlaıdy QazAqparat tilshisi finprom.kz portalyna silteme jasap.

Óńirler arasynda atalǵan salaǵa Shymkent qalasynda salynǵan ınvestıtsııa kólemi mol – 8 mlrd teńgege jýyq. Odan keıingi oryndarda Túrkistan (5,7 mlrd), Almaty (4 mlrd) jáne Jetisý oblystary (3,1 mlrd) tur. Sektorǵa negizinen jergilikti bdjetterden qarjy salynǵan. Onyń kólemi 19,9 mlrd teńgeni quraıdy.

Al kásiporyndar quıǵan menshikti qarajat 12 mlrd teńgege jetedi. Bul ótken jyldyń 4 aıyndaǵy kórsetkishten 32,1 paıyzǵa az. Respýblıkalyq bıýdjet esebinen beriletin ınvestıtsııa kólemi de 2,8 esege, 3,6 mlrd teńgege deıin qysqarǵan.

Bıyl mamyr aıynyń qorytyndysynda óner, kóńil kóterý jáne demalys salasyndaǵy qyzmetter baǵasy bir aıda 2,7 paıyzǵa, al jyl ishinde 16 paıyzǵa qymbattaǵan.

Óńirler arasynda qymbatshylyq Túrkistan oblysynda qatty baıqaldy. Óńirdegi sala qyzmetteriniń baǵasy bir jylda birden 40 paıyzǵa kóterilgen. Odan keıingi oryndarda Jetisý (37,9), Batys Qazaqstan (37,6), Almaty (26,9), Aqmola oblystary (25,5) tur. Jalpy sektorda balalar attraktsıondarynyń baǵasy bir jylda 24,5 paıyzǵa kóterilgen.