Bir jylda áýe kompanııalaryna 84 ınspektsııalyq tekserý júrgizildi
«Prezıdent Ákimshiligi, Úkimet, Indýstrııa jáne ınfraqurylymdyq damý mınıstrligi, Azamattyq avıatsııa komıteti birneshe jyl ishinde qoldanystaǵy zańnamany ózgertý boıynshaúlken jumys júrgizdi. Qazaqstannyń memlekettik retteý júıesinde alǵash ret brıtandyq modelge negizdelgen ushý qaýipsizdigin basqarýdyń eýropalyq tásili engizildi. Azamattyq avıatsııanyń negizgi zańyna jáne 61 zań aktilerine tıisti ózgerister engizildi. Bul eń zamanaýı standarttardy engizýge, saladaǵy sybaılas jemqorlyqty joıýǵa múmkindik beredi», - delingen habarlamada.
Búgingi kúni Qazaqstanda turaqty jáne turaqty emes reısterdi, júk reısterin, avıatsııalyq jumystardy júzege asyratyn, shaǵyn avıatsııa jáne jalpy maqsattaǵy avıatsııa paıdanýshylaryn qosa alǵanda 60 áýe kompanııa tirkelgen.
«Jyl ishinde áýe kompanııalarǵa 84 ınspektsııalyq tekserý jáne 4 sertıfıkattaý júrgizildi. Qazaqstanda tirkelgen áýe kemeleriniń jalpy sany – 788. Áýe kemelerine 280 ınspektsııalyq tekserý júrgizildi. Azamattyq áýe kemesin memlekettik tirkeý týraly 84 kýálik, 146 ushýǵa jaramdylyǵy sertıfıkaty, 18 azamattyq avıatsııanyń avıatsııalyq tehnıkasyna tehnıkalyq qyzmet kórsetý jáne ony jóndeý uıymyna sertıfıkat berildi. Qazaqstanda sertıfıkattalǵan 24 áýejaı bar, onyń ishinde 17 halyqaralyq jáne 7 ishki áýejaı, sondaı-aq 6 sertıfıkattalatyn tikushaq aılaǵy jumys isteıdi. Avıatsııa ákimshiligimen 11 áýejaı jáne 4 tikushaq aılaǵy sertıfıkattaldy, 13 ınspektsııalyq tekserý júrgizildi», - delingen habarlamada.
