Bir jylda 34 myń adamǵa onkologııalyq dıagnoz qoıylǵan
ALMATY. QazAqparat - Halyqaralyq qaterli isikti zertteý agenttiginiń málimetinshe, ótken jyly Qazaqstanda 34 myń adamǵa birinshi ret onkologııalyq dıagnoz qoıylǵan, dep habarlaıdy QazAqparat.
Dúnıejúzilik densaýlyq saqtaý uıymynyń deregine sensek, jyl saıyn álemde 18,07 mln adamǵa onkologııalyq dıagnoz qoıylady. 2018 jyly onkoaýrýdan 9,6 mln adam kóz jumǵan. Raktyń eń jıi kezdesetin túrleri - ókpe ragy, sút bezi isigi, toq jáne tik ishek isigi, qýyq bezi men asqazannyń qaterli isigi.
Dárigerlerdiń aıtýynsha, aýrý deńgeıine áser etip otyrǵan keń taralǵan máselelerdiń biri - medıtsınalyq kómekke kesh júginý jáne aýrý dıagnostıkasynyń qoljetimdilik deńgeıiniń tómendigi.
Almatydaǵy baspasóz máslıhatynda Amerıkalyq jáne Eýropalyq hırýrgtar kollegııasynyń músheleri, bilikti onkologtar qazir búkil álemde dıagnostıkanyń mynadaı ádisteri suranysta aıtty. Ol - rentgenografııa, ýltradybystyq zertteý, tekserýdiń endoskopııalyq ádisteri, kompıýterlik tomografııa, MRT (magnıttik-rezonanstyq tomografııa), PET-KT (pozıtrondyq-emıssıondyq tomografııa, kompıýterlik tomografııa), onkomarker testileri, ulpa bıopsııasy.
PET-KT - ishki organdardy zertteýge múmkindik beretin tomografııa túri. Al onkomarker - aýrýdyń erte satysynda onkoaýrýdyń bar-joǵyn anyqtap beretin qan taldamasy.
«Dıagnostıkada biz álemdik medıtsınanyń zamanaýı tásilderin qoldanýǵa tyrysamyz. Mysaly, stambýldyq klınıka tájirıbesinde aýrýdy erte satysynda anyqtaıtyn biregeı ádis - STC (Circulating Tumor Cells - aınalmaly isik kletkalary) dep atalady. Ony sondaı-aq «suıyq bıopsııa» dep te aıtady. Ol raktyń damýyn qan tamshysynan, erte satyda bilýge kómektesedi. Al bul kezde ony dástúrli ádstermen anyqtaı almaısyń», - deıdi radıatsııalyq onkologııa professory, Eýropalyq radıatsııalyq hırýrgtar qoǵamynyń (ESTRO) múshesi Hale Chalar.
Búginde árqıly qaterli isikterdi emdeýde aýrýmen tıimdi kúresýge múmkindik beretin ádis-tásilder qoldanylady.
«Barlyq tıisti terapevtik protsedýralardan keıin kórsetiletin pallıatıvti medıtsınalyq kómektiń mańyzy zor. Pallıatıvti kómek - onkologtar, farmatsevter, áleýmettik sala jumysshylary men medbıkelerdiń tájirıbesine negizdelgen keshendi ádis. Onyń maqsaty - patsıenttiń úırenshikti ómir saltyn barynsha qamtamasyz etý», - deıdi professor Hale Chalar.
