Bir jylda 3 memlekette bas júlde ıelendik - «Bastaý» dombyrashylar toby
«Biz búgin qazaq óneri asqaqtaǵan tamasha sáttiń kýási bolyp otyrmyz. 20 Arnold Shvartsnegger quryltaıshy bolyp sanalatyn, jyldan astam ýaqyt boıy uıymdastyrylyp kele jatqan bedeldi baıqaýda úzdik atanyp kelýlerińizben quttyqtaımyn!», - dedi Arystanbek Muhamedıuly dombyrashylardy qabyldaýda.
Ónerpazdar buǵan deıin de Latvııada ótken «Voshodıaşıe zvezdy» baıqaýynda jáne Izraılde ótken «World of music» saıysynda bas júldemen marapattalǵan.
Top músheleri Temirlan Oljabaı men Ernat Naýryz - Qazaq ulttyq óner ýnıversıtetiniń stýdentteri. Ótken jyly qazaqstandyq Dımash Qudaıbergen «I am singer» jobasyna qatysyp, «Daıdıdaý» ánin shyrqaǵanda dál osy balalar dombyramen súıemeldegen.
«Qazaq ulttyq óner ýnıversıtetinde Ernat ekeýmiz dombyra shertetinbiz. 2017 jyly Qytaıdyń Shansha qalasyna Dımashtyń kontsertine bardyq jáne ózimizdiń topty qurýdy uıǵardyq. Sol jyly 27 maýsymda Dımashtyń kontsertinde toptyń tusaýy kesilgen bolatyn. Bir jylda úsh úlken halyqaralyq konkýrstyń bas júldesin ıelendik. Baıqaýdan soń, sheteldikter bizge jaqyndap, dombyranyń neshe ishegi bar dep qyzyǵýshylyq bildirip jatty. Eki ishek degenimizde tań qalatyn. Dombyranyń dybysyn gollıvýdtyq saýndtrekterge qosý týraly usynystar tústi. Endi bári bolashaqtyń enshisinde», - dedi Temirlan Oljabaı jýrnalısterge bergen suhbatynda.
Aıta keteıik, World Championship of Performing Arts (WCOPA) - halyqaralyq talanttar olımpıadasy. Deńgeıi jaǵynan WCOPA dúnıejúzilik Olımpıada oıyndarymen teń. Álemdik shoý-bıznestiń astanasy Los-Andjeleste osymen 22 ret uıymdastyrylǵan olımpıadada 72 memlekettiń ókilderi baq talastyrdy. Qazaqstandyq ónerpazdar bul baıqaýǵa alǵash ret qatysyp, bas júldeni ıelendi.
