Bir jyl ishinde Qazaqstan shekarasynan esh qıyndyqsyz 15 ret ótken sheteldik anyqtaldy
TANA. 1 qyrkúıek. QazAqparat /Aıdar Ospanalıev/ - Bas prokýratýra búgin jýrnalısterdi elimizdiń shekarasynan esh qıyndyqsyz ótip júrgen sheteldikterdiń isine qatysty shyǵarylǵan birqatar sot sheshimderimen tanystyrdy.
Bas prokýratýranyń resmı ókili Jandos Ómiralıevtiń málimetterinshe,
Qyrǵyzstannyń Qoshqarov esimdi azamaty 2010 jyly sot sheshimimen elden shyǵarylǵanyna qaramastan, bıylǵy jyly Qazaqstannyń memlekettik shekarasynan 15 ret ótken.
Sondaı-aq J.Ómiralıevtiń málimetterinshe, elimizdiń kóptegen aımaqtarynda kóship-qonýshylarǵa qatysty tıisti ákimshilik jazalardy qoldanbaý áreketteri anyqtalǵan. Mysaly, bıylǵy jyldyń birinshi toqsanynda Petropavl qalasynyń ákimshilik soty materıaldardyń jetkiliksizdiginen ishki ister organdaryna 3 isti keri qaıtarýǵa májbúr bolǵan. Osyǵan qaraı polıtsııa qyzmetkerleri isti toqtatý jóninde qaýly shyǵarǵan. Al sheteldikter osy múmkindikti paıdalanyp, qashyp ketken. Osyndaı jaǵdaı Batys Qazaqstan oblysynda da oryn aldy. Onda osy aımaqtyń tártip saqshylary Ózbekstannyń 9 azamatyna qatysty ákimshilik isti sotqa joldaǵan, sot polıtsııa qyzmetkerlerine materıaldardy tolyqtyryp ákelýdi tapsyrǵan. Al polıtsııa qyzmetkerleri zań buzǵan sheteldikterdiń qujattaryn ózderine qaıtaryp, olardy erikterine jibergen.
