Bir jyl ishinde Qazaqstan kıikter sany 37 paıyzǵa kóbeıdi
ASTANA. QazAqparat - Kıikterdi qorǵaý baǵdarlamasy aıasynda júrgizilgen sharalardyń arqasynda olardyń sany ótken jylmen salystyrǵanda 37 paıyzǵa kóbeıdi.
Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Qorshaǵan orta jáne sý resýrstary mınıstri Nurlan Qapparov osylaı málim etti.
«Biz kóktem kezeńinde kıikterge sanaq júrgizdik. Onyń qorytyndysy boıynsha bul tuıaqty janýarlardy qorǵaý boıynsha qabyldanǵan sharalardyń tıimdiligin aıta alamyz. Ótken jylmen salystyrǵanda Qazaqstandaǵy kıikterdiń sany 37 paıyzǵa ósti jáne búgingi kúni 256 myńnan asyp jyǵylady», - dedi mınıstr.
N.Qapparovtyń sózine qaraǵanda, 2004-2005 jyldary aralyǵynda elimizdegi kıikterdiń sany 30 myń basqa deıin azaıyp ketken bolatyn.
«Biz barynsha baıypty qorǵaý sharalaryn júrgizip, brakonerlikpen kúresýdemiz. Sonymen qatar Qazaqstannyń jáne basqa da elderdiń úkimettik emes uıymdary tarabynan kóptegen kómek te boldy. Mamandardyń aıtýynsha, taıaý 5-10 jyldyń ishinde Qazaqstandaǵy kıikter sany jarty mıllıonǵa jetýi múmkin. Belgili bir ýaqytta olardyń sany naqty mejege jetkennen keıin olardyń ónimin naryqqa da shyǵarýǵa bolady», - dedi N.Qapparov.
