Bir jyl ishinde Astanada 36 jańa qonaqúı ashyldy
ASTANA. QazAqparat - 2016 jyldyń qyrkúıek aıynan beri Astanada 36 jańa qonaqúı paıda boldy. Ol týraly Astana qalasyn damytý jáne ınvestıtsııalar boıynsha basqarma basshysy Álisher Ábdiqadyrov málimdedi, dep habarlaıdy qalalyq ákimdiktiń baspasóz qyzmeti.
Onyń málimetinshe, elordanyń damýyna týrızm salasy súbeli úles qosty.
«Týrızm salasynda 3 myńnan astam jańa jumys oryndary ashyldy. Bıznes orta ındýstrııasy aýqymdy úles qosty. Kóp qonaq úıler josparlanǵan ýaqytynda ashyldy. Eger ótken jyly Astanada 165 qonaq úı jumys istese, búginde 201 qonaq úı qyzmet kórsetýde. EKSPO-nyń úsh aıynda qonaqúılerdiń toltyrymdylyǵy úsh esege artty», - dep habarlady Astana qalasy ákimdiginde ótken baspasóz konferentsııasy barysynda Ábdiqadyrov.
Ol hostelderdiń sany 76-dan 95-ke deıin óskenin aıtty. Budan bólek, «EKSPO-2017» halyqaralyq kórmesin ótkizý kezeńinde aımaq turǵyndary úshin elorda JOO-da 6,5 myń oryndy 16 jataqhana qoljetimdi baǵamen daıyndaldy.
«Jataqhanalarda jóndeý jumystary júrgizildi. Qural-jabdyqtar satyp alyndy. Eýrazııa ulttyq ýnıversıteti men Qazaq agrotehnıkalyq ýnıversıteti kórmeniń barlyq kezeńinde tolyq boldy», - deıdi ol.
Kórme kezinde brondaý bólimi qurylyp, ol arqyly aımaqtyq ákimdiktermen ózara qarym-qatynas ornatyldy jáne arnaıy biryńǵaı brondaý júıesi arqyly aımaqtyq delegatsııalardyń ornalasýy qadaǵalandy. Álisher Ábdiqadyrovtyń málimeti boıynsha, 2016 jylǵy kezeńmen salystyrǵanda, týroperatorlardyń qyzmetterine suranys 78%-ǵa artqan.
«Astana City Pass týrıst kartasyn 30 myńǵa jýyq adam qoldandy. Kórme kezeńinde eki qabatty ekskýrsııalyq avtobýstardy 5 myńnan astam adam paıdalandy. Bul ótken jylmen salystyrǵanda 2,5 ese kóp. Kórme kezeńinde aýdıogıdtardy 13 elden (Avstralııa, Malaızııa, Sıngapýr, Slovakııa, Reseı, Ázirbaıjan, Túrkııa, Germanııa, Qytaı, Ispanııa, Polsha, Frantsııa, Serbııa) 12 myń adam qoldandy», - dep atap ótti.
Jalpy basqarma aqparaty boıynsha elimizdiń barlyq týrıstik salasy úsh aı ishinde barynsha kómek kórsetip, sapaly jumys istedi.
