Bir jyl buryn joǵalǵan qarııa qystaqtan tabyldy
TALDYQORǴAN.QazAqparat - Almaty oblysynda bir jyl buryn joǵalǵan qarııa tabyldy. 70 jastaǵy aqsaqal eldi-mekennen shalǵaı jatqan sharýa qojalyǵynda baqtashy bolyp eńbek etken, dep habarlaıdy QazAqparat tilshisi.
Qarasaı aýdanyna qarasty Shamalǵan stansasynyń turǵyny byltyr jazda habar-osharsyz ketken. Alaıda týystary polıtsııaǵa onyń joǵalǵandyǵy jóninde habar bermegen. Óz erikterimen izdeý jumystaryn júrgizgen. Al 70 jastaǵy qarııanyń iz-tússiz ketkendigi jóninde málimet quzyrly organǵa bıyl naýryz aıynda túsken. Birden Qarasaı aýdandyq ІІB izdeý jumystaryna kirisip, 1947 jylǵy azamatty tapty. Joǵalǵan adam Іle aýdanyna qarasty shalǵaı jatqan sharýa qojalyqtarynyń birinen tabyldy. Ol óz erkimen mal baǵyp, nápaqasyn tapqan. Endi úıinen ketip qalǵan qart jaqyndaryna qaıta oralady. Búginde ol týystarymen de kezdesken. Jaqyndarynyń sózinshe, aqsaqal buǵan deıin de birneshe ret úıinen ketip qalǵan.
