Bir jyl buryn iz-túzsiz joǵalyp ketken aqtóbelik quldyqta bolǵanyn aıtyp berdi

Ortalyq bazarda júrgen Aqtóbe qalasynyń turǵynyna bógde adam kelip usynys bildirgen. Sóıtip, ol aıyna 30 myń teńgege mal baǵýǵa kelisken. Osy kelisimmen Jangeldi Mirjaqyp aýylǵa baryp, iri qara mal men qoı baqqan. Biraq sharýashylyq ıesi oǵan jalaqy tólemeı qoıǵan. Keıde uryp, jazalap kelgen.

«2017 jyldyń mamyr aıynda «mal baǵasyń, 30 myń teńge jalaqy beremin» dep alyp ketti. Qoı, iri qara mal baǵyp, jylqy qaradym. Keńqııaq aýylyndaǵy sharýashylyq ıesi Qanat Bazarǵalıev ýádesinde turmaı, maǵan jalaqy bermeı qoıdy. «Durys baqpadyń» dep urysyp, anda-sanda kelip uryp ketetin boldy. Ketýge oqtalyp, qashqan kezde taýyp alyp, qaıta jumysqa saldy», - dedi Jangeldi Mirjaqyp.

Otbasy qurmaǵan, aǵalarynyń janynda turatyn Jangeldi Mirjaqypqa birneshe aı buryn izdeý jarııalanyp, ishki ister organdarynyń joǵalǵandar tizimine qoıylǵan. Baýyrymen qaýyshqan otbasy endi oblystyq prokýratýraǵa aryz jazbaq.

«On bir aı boıy adamdy azaptaý durys pa? Bizder joǵalyp ketti dep izdeý jarııalap, aýylǵa qaıta-qaıta habar berdik. Sýretin kóshege ilip, jan-jaqqa jetkizdik. Tipti, kóripkelderge baryp, amandyǵyn bilgen kezder boldy. «Bir-eki aıda habary bolady» dep aıtqanda qýanyp, kútýmen boldyq. Bir kúni Zaýyt polıtsııa bóliminiń qyzmetkerleri tún ishinde baýyrymyzdyń sýretin jiberip, «osy adam ba» dep surady. Bir-birimizge habar berip, túnde alǵan habardan uıyqtamadyq», - dedi aǵasy Qazbek Mirjaqyp.
 

Keıin otbasy Temir aýdandyq ishki ister bólimine baryp, sol jerden Jangeldi Mirjaqypty alyp kelgen. Ony dárigerge qaratyp, alǵan jaraqattaryn rastap, qujat rásimdetken.

Aıta keteıik, Jangeldi Mirjaqyptyń aýylda mal baqqanyn polıtsııa qyzmetkerleri de bilmegen. Qoıdy qozysyna qosa almaǵan kezde sharýashylyq ıesi ony kezekti ret soqqyǵa jyqqan kezde sonda saýynshy bolyp jumys isteıtin aýyl turǵyny polıtsııaǵa habar beredi. Quqyq qorǵaý qyzmetkerleri quldyqta bolǵan Jangeldi Mirjaqypty alyp ketip, keıin bul habardy aýdan ortalyǵyna jiberedi. Onyń izdeýdegi adam  ekeni de sol kezde anyqtalady.

«Biz adamdy kúshtep ustap, jalaqysyz mal baqqyzǵan sharýashylyq ıesi qylmystyq jaýapkershilikke tartylýy kerek dep esepteımiz. Sondyqtan oblystyq prokýratýraǵa aryz jazyp otyrmyz», - dedi Qazbek Mirjaqyp.

Jangeldi Mirjaqyptyń qosymsha túsinikteme bergeni týraly aqparatty Temir aýdandyq prokýrory Nurdáýlet Sultanov rastap otyr. Aqtóbe oblystyq prokýratýrasy da Jangeldi Mirjaqyptyń aryzyn qabyldap aldy.