Bir jyl boıy demalyssyz jumys istedik – Kúnsulý Zakarıa
NUR-SULTAN. QazAqparat – «Qazaqstandyq vaktsınaǵa ǵylymı baǵa klınıkalyq zertteýlerdiń úshinshi fazasy aıaqtalǵannan keıin beriledi. Ortalyq kommýnıkatsııalar qyzmetinde ótken brıfıngide Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa osylaı aıtty, dep habarlaıdy QazAqparat tilshisi.
«Qazirgi ýaqytta tek bizdiń el emes, búkil dúnıe júzindegi vaktsınalar osy strategııamen júrip kele jatyr. Endi úshinshi fazanyń aıaqtalýyn kútip, negizgi nátıjeni kútýimiz kerek. Qazirgi ýaqytta aralyq kórsetkishter jaman emes», - dep atap ótti Kúnsulý Zakarıa.
Onyń aıtýynsha, otandyq ónimge, muǵalimder men dárigerlerge qoldaý bildirýimiz kerek.
«2020 jyldyń 20 naýryzynan bastap biz úsh aýysymdyq jumyspen toqtaýsyz, demalyssyz jumys istep jatyrmyz. BAQ ókilderi men áleýmettik jeli qoldanýshylary qazaqstandyq ǵalymdar týraly ne jazbaı jatyr? Sizderden bir ǵana ótinish – bizge tym bolmaǵanda moraldyq turǵyda qoldaý kórsetińizder. Bul vaktsına – qazaqstandyq ǵalymdar shyǵaryp jatqan otandyq ónim. Bul jumysty jumyla atqarýymyz kerek. Úkimet kómektesip, qanshama qarjy bóldi. Biz aıanbaı jumys istep jatyrmyz. Vaktsınany synap kórý úshin maımyldar qajet boldy. Ony shetelden qalaı aldyrǵanymyz týraly tipti kitap ta jazýǵa bolady. Bul jerde QR Ulttyq qaýipsizdik komıteti de, basqa da quziretti organdar kómektesti», - deıdi ol.
