Bir jarym jylda qurylysy uzaqqa sozylǵan nysandar eki esege qysqardy – Altaı Kólginov
NUR-SULTAN. QazAqparat - Nur-Sultan ákimi máslıhat depýtattaryna jyl qorytyndysy týraly aıtyp berdi. Bul týraly Altaı Kólginov óziniń «Instagram» paraqshasynda jazdy, dep habarlaıdy ákimdiktiń resmı saıty.
«Qoljetimdi áleýmettik baspana 3 ese, al mektepter 2 ese kóbeıdi. Ońaltý jáne medıtsına ortalyqtary jelisi keńeıtilip, gaz tartyldy, uzaqqa sozylǵan qurylystar aıaqtalyp, apatty jaǵdaıdaǵy eski úıler súrildi, sýaǵarlar salynyp, turǵyn alaptary damytyldy jáne taǵy basqa jumystar atqaryldy. Bul 2020 jyly atqarylǵan jumystardyń tek bir bóligi ǵana. Búgin máslıhat depýtattaryna jyl qorytyndysy týraly aıtyp berdim. Negizgilerine toqtalaıyn.
Birinshi. Jeńildikpen beriletin qoljetimdi baspana
Prezıdent tapsyrmasymen qoljetimdi áleýmettik baspana qurylysy kólemin 3 ese arttyrdyq. Eger byltyr bul shamamen 8 myń páter bolsa, 2021 jyly 10 myńnan astam páter salýdy josparlap otyrmyz. Turǵyn úılerdiń bir bóligi halyqtyń áleýmettik osal toptary úshin bolsa, basqasy Turǵyn úı qurylys jınaq bankinde kezekte turǵandar úshin. Buǵan qosa QIK-pen birlesken baǵdarlama boıynsha áleýmettik páter alatyndar sanatyn birshama keńeıttik. 2021 jyly turǵyn úı sertıfıkattary boıynsha járdem kólemin 1 mıllıonnan 1,5 mıllıon teńgege deıin ulǵaıtamyz.
Ekinshi. Uzaqqa sozylǵan qurylystar
Bir jarym jyl ishinde uzaqqa sozylǵan qurylystar sany eke ese qysqarady. 2019 jylǵy jazda 52 nysan boldy. Ótken jyly 10 uzaqqa sozylǵan qurylysty aıaqtasaq, bıyl eki ese kóp. Úlestik qurylys nysandary boıynsha sharalar jospary bar.
Úshinshi. Apattyq jaǵdaıdaǵy eski úıler
2019 jyly apattyq jaǵdaıdaǵy eski úılerden 200-ge jýyq otbasy kóshirildi. Al bıyl 200-den astam otbasyn, 2021 jyly 250-den astam otbasyn kóshirýdi josparlap otyrmyz.
Tórtinshi. Mektep qurylysy
Bıyl úsh aýysymmen bilim beretin mektepter sanyn 8-den 4-ke, al tolyq rejımde oqıtyn mektepter sanyn 22-den 14-ke qysqarttyq. Byltyr 6 mektep, al bıyl 2 ese kóp mektep saldyq. Bir bóligi paıdalanýǵa berildi.
Besinshi. Áleýmettik nysandar qurylysy
«Úı mańyndaǵy dáriger» degen 29 nysan, erekshe balalarǵa arnalǵan 5 ońaltý ortalyǵy, baspana salasynda qyzmet kórsetetin biryńǵaı ortalyq, erekshe balalar tárbıelep otyrǵan analar jumys isteıtin birqatar ortalyq pen taǵy basqalaryn ashtyq.
Altynshy. Turǵyn alaptaryn damytý, gaz tartý
Temirjol turǵyn alabyna gaz tartyp jatyrmyz. 100-den astam kóshe salyp, 40 qoǵamdyq keńistik pen aýlany abattandyrdyq. Mektepter, áleýmettik baspana, medıtsına ortalyqtary, dene shynyqtyrý-saýyqtyrý keshenderin salyp jatyrmyz. 5 km astam káriz ben sý qubyry jelilerin, 3 km astam sýaǵar, 4 KSS pen taǵy basqasyn tarttyq.
Jetinshi. Alda da jumys kóp. Kelesi jylǵa jospar quryp jatyrmyz. Aıtylǵan baǵyttardan ózge taǵy 3 júıeli másele bar: JETs-3, káriz tazartý qurylǵylaryn (KTQ-2), sorǵy-súzgish stantsııasyn salý (SSS-3). Bul máseleler pysyqtalyp jatyr», - dep jazdy Altaı Kólginov.
