Bir jarym kún boıy adasqan reseılik Qostanaıdan tabyldy
QOSTANAI. QazAqparat - Qostanaılyq polıtseı adasyp ketken Reseı turǵynyna kómektesti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Reseıdiń Chelıabi oblysy Bredın aýdany 77 jastaǵy turǵyny Antonına Chepýhına 24 naýryzda tańǵy júgirýge shyǵyp, adasyp ketken. Birneshe saǵattan keıin onyń týystary jergilikti polıtsııa organdaryna, RF men QR shekara bólimshelerine habarlasyp, dabyl qaqty.
«Joǵalǵan áıel abaısyzda Qazaqstan Respýblıkasynyń shekarasyn kesip ótken. Onyń Qostanaı oblysy, Denısov aýdany, Komarov aýyldyq okrýginiń aýmaǵynda júrgeni anyqtaldy. Іzdeý jumystaryna Denısov aýdandyq polıtsııa bóliminiń jeke quramy jumyldyryldy», - delingen oblystyq polıtsııa departamentiniń baspasóz habarlamasynda.
Ýchaskelik ınspektor Sábıt Baıtyshev bastaǵan izdeý toby bir jarym kún boıy adasyp júrgen Reseı azamatyn tapty. Ol Komarovka aýylynan 10 shaqyrym jerdegi Ýstrashımoe kóliniń janynda júrgen.
Ýchaskelik polıtsııa qyzmetkeri zeınetkerdi jaqyn jerdegi eldi mekenge jetkizip, medıtsınalyq kómek kórsetti.
Zeınetkerdiń týystary qutqarýǵa kómektesken polıtsııa qyzmetkerlerine alǵystaryn bildirdi.
