Bir ýys tarysy men qurtyn bólip bergen qazaq halqyna alǵys aıtamyz - Inna Lı

 AQTÓBE. QazAqparat - Ákem 6 jasynda jer aýdarylyp, qazaq dalasyna keldi. Ózderi toıyp tamaq ishpegen, bútin kıim kımegen qazaq halqy qolynda baryn berdi. Bul týraly tarıh pániniń muǵalimi, ýnıversıtet oqytýshysy Inna Lı aıtyp berdi, dep habarlaıdy QazAqparat tilshisi.

 Qudaıbergen Jubanov atyndaǵy Aqtóbe óńirlik memlekettik ýnıversıtetiniń oqytýshysy Inna Lı ákesi Klımentevtiń taǵdyryn kózine jas almaı aıta almaıdy. Klımentev bar bolǵany 6 jasynda ata-anasymen birge jer aýdarylǵan. «Ákem adamdarǵa emes, malǵa arnalǵan vagonmen birneshe aı boıy júrip, qazaq jerine keldi. Ol óz áńgimelerinde «jol boıy adamdardyń óli denesi taý bolyp úıilip jatty» dep jıi aıtady. Ashtyqtan, shólden kóz jumǵan adamdardy eshkim jerlemedi. Olardy tek vagonnan ysyryp, jerge laqyryp tastaǵan. Qazaq jerine kelgen soń olarǵa jatyn oryn, tamaq bergen de eshkim bolmady. Koreı halqyn shpıon dep atap, olarǵa jaqyndaýǵa tyıym salǵan. Barlyq kedergige qaramasqan qazaq halqy bizdiń ata-babamyzǵa kómektesti. Sol úshin de alǵysymyz sheksiz»,- dedi  Inna Lı. 

 Dál sol kezde Japonııada soǵys bolyp jatty. Al qazaq jerine kelgen koreı halqyn japondardyń shpıony dep aıyptady. Kómektesýge, qamqor bolýǵa jan-jaqty tyıym salynǵanymen, qazaq halqy basyna is túsken adamdardy baýyryna basty. «Asharshylyq jyldaryn ótkergen halyqtyń jaǵdaıy nashar boldy. Soǵan qaramastan olar qurt, bir ýys tary ákeldi. Qystaýǵa jaıǵasqan qazaqtyń ár otbasy birneshe adamǵa pana berip, óz shańyraǵyna shaqyrdy. Bir mezette eki otbasyn baqqan adamdar da boldy. Sondyqtan «Alǵys aıtý kúniniń» biz úshin mańyzy men máni zor. Qazaqtyń jerine kelip, halyqtyń qamqorlyǵyna bólengen ár ult alǵysyn aıtýy kerek dep esepteımin.

 «Koreıaǵa qaıta oralǵyńyz kelmeı me?» dep suraıdy. Men - Qazaqstan azamatymyn. Men osy jerde týyp óstim. Tarıhı Otanyma baryp, tanysqym keledi. Biraq men ol jaqqa túbegeıli qonystanyp qalǵym kelmeıdi. Sebebi, Qazaqstan - meniń Otanym»,- dedi Inna Lı.