Bir túnniń ishinde 47 bala menıngıtpen tústi degen aqparat shyndyqqa janaspaıdy - DSM
ASTANA. QazAqparat - Bir túnniń ishinde 47 bala menıngıtpen tústi degen aqparat shyndyqqa janaspaıdy. Bul týraly búgin Ortalyq kommýnıkatsııalyq qyzmetinde ótken brıfıngte Bas sanıtarlyq dáriger Jandarbek Bekshın aıtty.
«Bir túnniń ishinde 47 bala menıngıtpen tústi degen aqparat shyndyqqa janaspaıdy. Astanada menıngokokk ınfektsııasymen jyl basynan beri 47 jetkinshek túsken. Derttiń maýsymdyq kúsheıýi ádette tamyz jáne qyrkúıek aılaryna keledi, degenmen bıyl bir aıǵa erterek bastaldy. Maýsym men shilde óte ystyq boldy. Osyǵan baılanysty bizdiń ınfektsııalyq mamandar osy máselemen aınalysýda. Bir túnde 47 bala túsken joq. Bul san - jyl basynan bergi kórsetkish», - dedi J. Bekshın.
Onyń aıtýynsha, qaladaǵy barlyq sýburqaqtar, Esil ózeniniń sýy tekseristen ótkizilgen jáne odan enterovırýstyq qozdyrǵyshtar tabylmaǵan. «Sonymen qatar biz qazir jemis-jıdek, kókónisterdi de tekserýdemiz. Ázirge ol maýsymdyq deńgeıde. Biraq ol bir aıǵa erterek bastalǵandyǵyn qaıtalap aıtamyn», - dep atap ótti ol.
Aıta keteıik, ótken túnde balalarǵa arnalǵan ınfektsııalyq aýrýhanaǵa menıngıt dıagnozymen 47 bala tústi degen sýyt habar tarap ketken bolatyn.
