Bir túnde Almaty polıtsııasyna 105 jetkinshek jetkizildi
ALMATY. QazAqparat - Almaty polıtsııasy Helloýın túni ata-anasynyń qaraýynsyz júrgen 105 jasóspirimdi bólimshege jetkizdi, dep habarlaıdy QazAqparat tilshisi.
Qalada oqýshylardyń kúzgi demalysy kezinde «Demalys» profılaktıkalyq sharasy ótip jatyr.
«Keshe jasóspirimderdiń kóp júretin oryndarynda reıd júrgizdik. Tekserý barysynda Helloýın túninde ata-anasynyń qaraýynsyz júrgen oqýshylar izdestirildi. Reıd barysynda kóptegen ata-analardyń balasyn qadaǵalamaıtynyna kóz jetkizdik», - dedi jergilikti polıtsııa qyzmetiniń jasóspirimder polıtsııasy basqarmasynyń ókili Leıla Álipbaeva.
Helloýın túninde tártip saqshylary 105 balany bólimshege apardy.
Olardyń 77-si ákimshilik quqyqbuzýshylyq jasaǵan. Balalardy beıimdeý ortalyǵyna 8 bala jetkizildi.
«Túngi ýaqytta kámelettik jasqa tolmaǵan balalardyń kóńil kóterý oryndarynda ata-anasynyń nemese zańdy ókilinsiz júrgeni úshin 96 ata-ana ákimshilik jaýapkershilikke tartyldy. 9 kompıýter klýbynyń ıesine qatysty is ákimshilik sotqa baǵyttaldy. Reıd barysynda 2 jerde jasóspirimderge alkogoldi ishimdik pen temeki satylǵany belgili boldy. Quqyqbuzýshylyq jasaǵan 5 bala esepke alyndy», - dedi Leıla Álipbaeva.
