Bir top senatordyń depýtattyq ókilettikteri aıaqtaldy
ASTANA. QazAqparat - Búgin Parlament Senatynyń jalpy otyrysy jańa saılanǵan quramda alǵash ret ótti. Sondyqtan da, jańa quramnyń qyzmetke kirisýine oraı jalpy otyrysta bir top senatordyń depýtattyq ókilettik merzimderi aıaqtaldy. Osyǵan oraı, Senat Tóraǵasy Qasym-Jomart Toqaev merzimderi aıaqtalǵan senatorlarǵa alǵysyn jetkizdi.
Eske sala keteıik, 2014 jyldyń 1 qazanyndaǵy saılaýda QR Parlamenti Senatynyń 16 depýtaty saılanyp, olardy Ortalyq saılaý komıssııasy resmı tirkeýden ótkizdi. Saılanǵan 16 depýtattyń tórteýi burynǵy senatorlar bolatyn. Atap aıtqanda, Mıhaıl Bortnık, Sársenbaı Eńsegenov, Erbolat Muqaev pen Sergeı Plotnıkov óz saılaýshylarynyń senimine ekinshi márte ıe bolyp, jańa konstıtýtsııalyq merzimge qaıta saılandy.
«Sonymen qatar, bir top áriptesterimiz ózderiniń Senat depýtattyǵy retindegi ókilettikterin abyroımen aıaqtap shyqty. Ókinishke qaraı, asa qurmetti áriptesimiz Qazaqstannyń eńbek sińirgen zańgeri Iran Ámirovpen máńgilikke qoshtasýymyzǵa týra keldi. Ómiriniń sońǵy sáttirine deıingi sanaly ǵumyryn memleketke rııasyz qyzmet etýge arnaǵan Iran Ámirovtiń esimi bizdiń jadymyzda árdaıym saqtalady», - dedi Q. Toqaev.
Budan bólek, palata spıkeri Senatta birge qyzmet etken, depýtattyq mindetti adal jáne joǵary jaýapkershilikpen atqarǵany úshin ókilettigi aıaqtalǵan senatorlarǵa Elbasynyń rızashylyǵyn jetkizdi. «Parlament qabyrǵasynda Memleket basshysynyń tapsyrmasyn tııanaqty oryndaýdaǵy, joǵary deńgeıdegi kásibı sheberlik kórsetip, zań jobalary boıynsha belsendi jumystaryńyz úshin alǵysymdy aıtamyn. Sizderdiń el ıgiligi jolyndaǵy qajyrly eńbekterińizdi áriptesterińizben qatar, birlese jumys istegen Úkimet músheleri, sondaı-aq búkil qoǵam joǵary baǵalaıdy. Osy jyldar ishinde eńbekterińiz laıyqty baǵalanyp, elimizdiń joǵary nagradalary men halyqaralyq uıymdardyń marapattaryna ıe boldy. Árqaısyńyz otandyq parlamentarızmniń damýyna, jalpy alǵanda elimizdiń tabysty órkendeýine aıtarlyqtaı úles qostyńyzdar», - dedi spıker Q. Toqaev.
Depýtattyq ókilettik merzimi aıaqtalǵandar: Qaısar Omarov, Jumabek Tóregeldınov, Svetlana Jalmaǵambetova, Nurlan Súleımenov, Aleksandr Savchenko, ıÝrıı Kýbaıchýk, Hýsaın Valıev, Qojahmet Baımahanov, Orynbaı Rahmanberdıev, Ermek Jumabaev, Anatolıı Bashmakov.
«Qazaqstan halqy men memleket ıgiligi jolyndaǵy sizderdiń jemisti qyzmetterińiz zamandastaryńyzǵa úlgi bolary anyq. Jınaqtaǵan mol ómirlik tájirıbelerińiz, salmaqty oı-pikirlerińiz ben tereń bilimderińiz aldaǵy ýaqytta Qazaqstandy odan ári damytý jolynda qaltqysyz qyzmet eteri sózsiz», - dedi Q. Toqaev.
