Bir top Májilis depýtaty Almaty oblysyn aralap, halyqpen kezdesýde

TALDYQORǴAN. QazAqparat - Almaty oblysynyń Jambyl aýdanyna barǵan halyq qalaýlylary qoǵamdyq qabyldaý ótkizip, turǵyndardyń ózekti máselelerin tyńdady, - dep habarlaıdy QazAqparat tilshisi.

176 myńnan astam halqy bar aýdanda áli de sheshimin tappaǵan ózekti máseleler jetkilikti. Atap aıtqanda kóp balaly analardyń ataýly áleýmettik kómek alý tóńireginde túsinbeýshilikter bar. Sondaı-aq aýyz sý júıesimen qamtylmaǵan, kóshesine asfalt tóselmegen eldi-mekender bar. Jol qurylysy, kóshi-qon máseleleri de nazardan tys qalǵan joq. Depýtattar Úkimetke saýal joldap, jergilikti atqarýshy bılikpen birlese oń sheshim shyǵarýǵa senim bildirdi.

«Ataýly áleýmettik kómek máseleleri boıynsha kópbalaly analar kelip jatyr. Zań júzinde qalaı ekenin bilmeıdi. Sonyń jolyn kórsetip jatyrmyz. Maqsat - naqty-naqty máselelerdi osy jerde sheshý. Sheshe almaı qalǵan jaǵdaıda depýtattyq saýal joldap, sol máselelerdi sheshýge daıynbyz»,- dedi QR Parlamenti májilisiniń depýtaty Álııa Ábsemetova.