Bir top aqtóbelik «Halyq alǵysy» medalimen marapattaldy
AQTÓBE. QazAqparat - Óńirdegi bilim berý, densaýlyq saqtaý, áleýmettik qorǵaý salalaryndaǵy, sondaı -aq pandemııaǵa qarsy kúrestegi qajyrly eńbegi úshin 22 azamatqa «Halyq alǵysy» medalin tabystady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
«Bıyl bárimizge de úlken synaq boldy. Álemdi álekke salǵan indet el shetine kelgende, oǵan qarsy turýǵa búkil el bolyp jumyldyq. Karantın rejımine kóship, ádettegiden tys jaǵdaıda jumys isteýge ıkemdeldik. Memleket basshysy Qasym-Jomart Toqaev qaýipti vırýstyń keń tarap ketpeýi úshin osyndaı kúrdeli, biraq asa qajet sheshim qabyldady. Dárigerlerimiz bilimi, tájirıbesiniń arqasynda qanshama adamnyń ómirin saqtap qaldy. Halyqtyń densaýlyǵy men qaýipsizdigin qamtamasyz etý qaýip - qaterge qaramaı indetke qarsy kúresý – naǵyz patrıotızmniń kórinisi dep sanaımyn. Ózderińizdeı azamattar búgingi kúnniń shynaıy batyrlaryna Halqymyzdyń alǵysy sheksiz», - dep atap ótti aımaq basshysy O.Orazalın.
«Halyq alǵysy» medalimen Ákimshilik polıtsııa basqarmasy bastyǵynyń orynbasary Erlan Álımaǵanbetov, Aqtóbe qalasy ákimshilik polıtsııa bóliminiń bastyǵy Vıacheslav Bıkmuhanov, oblystyq densaýlyq saqtaý basqarmasy basshysynyń orynbasary Aıgúl Dúısenbaeva, «Jaısań» shekara baqylaý bólimshesiniń kishi baqylaýshysy Arslan Orazov jáne taǵy da basqa ártúrli sala mamandary men kásipkerler, eriktiler tobynyń jetekshileri marapattaldy.
