Bir táýliktiń ishinde shekarashylar 67 sheteldik azamatty ustady
ASTANA. QazAqparat - Ótken táýlik ishinde qazaqstandyq shekarashylar memlekettik shekaranyń ártúrli bóliginde kóshi-qon zańdylyǵyn buzǵan 67 azamatty ustady, dep habarlaıdy QR UQK Shekara qyzmetiniń baspasóz qyzmeti.
Atap aıtqanda, osy jyldyń 11 jeltoqsany kúni 15 saǵat 30 mınýt shamasynda Saryaǵash shekara otrıadynyń shekarashylary reıd barysynda «Qaplanbek - avto» baqylaý-ótkizý beketiniń mańaıynda zańsyz júrgen Ózbekstan Respýblıkasynyń 42 azamatyn ustady. Qujattaryn tekserý barysynda olardyń bizdiń elimizden shyǵý merziminiń 30 táýlikten 150 táýlikke deıin sozylyp ketkendigi anyqtaldy.
Kóshi-qon zańdylyǵyn buzǵan basqa azamattar «Almaty», «Qorǵas», «Atyraý-avıa», «Qurmanǵazy-avto», «Jibek joly - avto», «Jaısań - avto», «Jańajol-avto», «Beıneý-avto» baqylaý-ótkizý beketterinde qolǵa tústi. Ustalǵandardyń arasynda QHR, Túrkııa, Qyrǵyzstan, Tájikstan eliniń azamattary kezdesedi.
QR Ákimshilik-quqyqbuzýshylyq kodeksiniń 517-babyna sáıkes ustalǵandardyń barlyǵy ákimshilik jazaǵa tartyldy.
