Bir táýliktiń 15 saǵatynda alkogol ónimin satýǵa tyıym salynýy múmkin
ASTANA. QazAqparat - Búgin Parlament Májilisi «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasynyń basty jańalyqtarynyń biri kúshti alkogol ónimderin satý ýaqyty 15 saǵatqa deıin shekteý bolyp tabylady. ıAǵnı, qujatqa sáıkes, meıramhanalardy, dámhanalar men barlardy qospaǵanda, keshki saǵat 21-den bastap, kelesi kúngi 12-ge deıin jumys jáne demalys kúnderine bólinbesten kúshti alkogol ónimderin satýǵa tyıym salynady. Bul negizinen 30 gradýstan joǵary bolatyn spırtti ishimdikterge baılanysty bolyp tabylady. Al kúshtiligi budan tómen alkogolderge ýaqyttyq shekteýler burynǵysha túngi 23-ten tańǵy 8-ge deıin tyıym bolady.
Budan bólek, zań jobasynda spırtti ishimdikterdiń satylý oryndaryn shekteý normalary da kózdeledi. Toqtala ketetin jaıt, búgingi kúni bazarlarda, kóterme saýda bazarlarynda, dúńgirshekterde, sondaı-aq belgilenbegen oryndarda alkogol ónimderin satýǵa tyıym salynǵan. Al jańa zań jobasymen buǵan densaýlyq saqtaý, bilim berý, balalar mekemeleriniń ǵımarattarynda, dene shynyqtyrý-saýyqtyrý, sport jáne sporttyq-tehnıkalyq qurylystarda tyıym salynatyn bolady. Sonymen qatar avtojanarmaı quıý stansalarynda tyıym salý belgilenedi.
Budan basqa, zań jobasynda bıznes sýbektilerin kontrafaktilik jáne zańsyz alkogol ónimin satyp alýdan saqtandyrý maqsatynda alkogol ónimine arnalǵan eseptik-baqylaý tańbalarynyń tólnusqalyǵyn aıqyndaıtyn quraldardy engizý kózdeledi.
Tutastaı alǵanda, zań jobasyn ázirleý elimizdiń ekonomıkalyq múddelerin, ekonomıkalyq qaýipsizdigin, azamattardyń ómiri men densaýlyǵyn qorǵaý qajettiginen týyndap otyr. Bul rette memleket etıl spırti men alkogol óniminiń óndirilýi jáne aınalymy protsesinde týyndaıtyn quqyqtyq qatynastar salasyndaǵy qatysýshylarǵa yqpal etýdiń tıimdi tetikterin ıelenýi tıis. Eknshi oqylym barysynda palata depýtattary alkogol óniminiń jasyryn jarnamasyna tyıym salý, etıl spırti men alkogol ónimin óndirý sharttaryn, sondaı-aq alkogol óniminiń aınalymy men olardy alyp ótý sharttaryn naqtylaýǵa qatysty usynystar engizildi.
