Bir táýlik ishinde QR kolonııasyna esirtki zatyn ótkizýdiń birneshe faktisi áshkerelendi

ASTANA. QazAqparat - Respýblıkada esirtki zatyn túrmege ótkizýdiń birneshe faktisi tirkeldi, dep habarlady QR ІІM QAJ komıtetinen.

20 tamyzda saǵat 01:00 shamasynda Almatydan 40 shaqyrym jerdegi Zarechnyı kentindegi LA -155/8 qatań tártiptegi kolonııasynyń aýmaǵynda negizgi shepten temir tordyń ar jaǵyna esirtki zatyn laqtyrmaq bolǵan Almaty turǵyny ustaldy. Saraptama jumystary oramada salmaǵy 250 gramm marıhýana bolǵanyn anyqtady. 1,5 saǵattan keıin osy mekemeniń qyzmetkerleri negizgi sheptiń mańaıynda geroın ótkizbek bolǵan adamdy qolǵa túsirdi.

Almaty qalasynyń tergeý ızolıatorynyń aýmaǵynda esirtki zatymen bir er adam ustaldy. Tintý barysynda odan geroın tárkilendi.

Atalǵan faktiler boıynsha materıaldar protsessýaldyq sheshim qabyldaý úshin qylmystyq qýdalaý organdaryna jóneltildi.

«Saraptama kórsetkendeı, tyıym salynǵan zattardyń (esirtki, spırtti ishimdik, uıaly telefondar) shamamen 98%-y túzetý mekemeleri mańynda ustalýda», - delingen habarlamada.