Bir táýlik ishinde Qazaqstanda bolý tártibin buzǵan 16 ózbekstandyq ustaldy
Atap aıtqanda, Shekara qyzmetiniń «Batys» óńirlik basqarmasyna qarasty «Áıteke bı» shekara zastavasynyń shekarashylary jergilikti quqyqqorǵaý organdarymen birlese otyryp júrgizgen reıd barysynda Qarabutaq eldimekeniniń aýmaǵynda tıisti qujatsyz júrgen Ózbekstan Respýblıkasynyń 6 azamatyn ustady.
Tergeý barysynda ózbekstandyq azamattar Qazaqstan jerinde jumys izdep júrgendikterin aıtty. Olardy ustaý boıynsha materıaldar QR Ákimshilik-quqyqbuzýshylyq kodeksiniń 517 babynyń 5 tarmaǵy boıynsha Aqtóbe oblysynyń Áıteke bı aýdandyq ishki ister bólimine berildi.
Shekara qyzmetiniń «Ońtústik» óńirlik basqarmasyna qarasty «Leńgir» komendatýrasynyń áskerı qyzmetshileri Ońtústik Qazaqstan oblysynyń Leńgir qalasynyń aýmaǵynda qujatsyz júrgen Ózbekstan Respýblıkasynyń 6 azamatyn ustady. Qujattary joq bolǵandyǵyna qaramastan, olardyń eńbek etip júrgendikteri belgili boldy. Bul derek boıynsha materıaldar Ońtústik Qazaqstan oblysynyń Tólebı aýdandyq kóshi-qon polıtsııasyna berildi.
Shekara qyzmetiniń «Shyǵys» óńirlik basqarmasyna qarasty Shonjy shekara otrıadynyń shekarashylary shekaralyq-tólqujattyq rejımdi tekserý kezinde Shonjy eldimekeniniń mańaıynda shekaralyq rejımdi buzǵan Ózbekstan Respýblıkasynyń 4 azamatyn ustady. Tergeý kezinde olar ózderiniń jumys izdep júrgendikterin aıtyp aqtaldy.
QR Ákimshilik-quqyqbuzýshylyq kodeksiniń 510-babynyń 1-bóliminiń 2-tarmaǵy boıynsha ózbekstandyq azamattardyń árqaısysyna 4955 teńgeden aıyppul salyndy.
