Bir táýlik ishinde qaıtarylǵan bılet sany 11 ese ósti – QTJ

NUR-SULTAN. QazAqparat – «Jolaýshylar tasymaly» AQ Marketıng jáne satý departamentiniń dırektory Almas Aıtbaev Nur-Sultan jáne Almaty qalalary karantın rejımine kóshýine baılanysty qandaı baǵyttaǵy poıyzdardyń jumysy toqtaǵanyn aıtty, dep habarlaıdy QazAqparat tilshisi.

«Búginge deıin 9 memleketaralyq poıyz, Qazaqstan aýmaǵynda 7 poıyz baǵyty qysqartyldy. Elimizde júretin poıyzdar ázirge shtattyq rejımde jumys isteýde. Bul másele qazirgi ýaqytta Úkimet deńgeıinde qaralyp jatyr», - deıdi «Jolaýshylar tasymaly» AQ Marketıng jáne satý departamentiniń dırektory Almas Aıtbaev.

Ol elimizdegi QTJ kassalarynyń sany 230 ekenin jáne olar táýlik boıy kúsheıtilgen rejımde jumys istep jatqanyn aıtty.

«Bir táýlik ishinde qaıtarylǵan bılet sany 11-12 ese ósti. Mysaly, buryn bir táýlikte 7 myń bılet qaıtarylsa, qazirgi ýaqytta táýligine 80 myń bılet qaıtarylýda. Bıletti ótkizý úshin bılet pen jeke kýálikti kórsetý kerek», - deıdi ol.