Bir táýlik ishinde habar-osharsyz ketken 4 aqmolalyq tabyldy
KÓKShETAÝ. QazAqparat – Aqmola oblysynda bir táýlikte habar-osharsyz ketken tórt adam tabyldy, dep habarlaıdy QazAqparat.
Aqmola oblysy polıtsııa departamenti baspasóz qyzmetiniń málimetinshe, 12 shildede Esil aýdandyq polıtsııa bóliminiń kezekshi bólimine 72 jastaǵy jergilikti turǵyn habarlasyp, 26 jastaǵy nemeresin izdeýge kómek kórsetýdi suraǵan.
«Zeınetkerdiń aıtýynsha, nemeresin turǵylyqty mekenjaıy boıynsha tappaǵan jáne telefon qońyraýlaryna jaýap bermeıdi. Ózimen birge turatyn 9 jasar shóberesi de anasynyń joqtyǵyna alańdaýly ekenin aıtqan. Jedel-izdestirý is-sharalarynyń nátıjesinde kelesi kúni tańerteń áıel kórshi aýyldan tabyldy», – dedi vedomstvodan.
Sol kúni jedel ýákilder Kókshetaý qalasynyń 36 jastaǵy turǵynyn jáne jumysqa ketken Torǵaı aýylynyń 32 jastaǵy turǵynyn anyqtady.
Habar-osharsyz ketkenderdiń bári úılerine aman-esen oraldy. Al oblys ortalyǵynyń taǵy bir turǵyny úıine oralýdan bas tartty.
Ony polıtsııaǵa kúıeýi izdep, habarlasqan. Polıtsııa qyzmetkerleri áıeldiń Nur-Sultan qalasynda ekenin anyqtaǵan.
«Jedel-izdestirý is-sharalaryn ótkizý kezinde jalǵa beriletin páterlerdi, ońaltý ortalyqtaryn tekserýge, qańǵybastyqpen aınalysatyn adamdardy sýretke túsirýge jáne daktıloskopııalaýǵa, basqa qaladan kelgen kólikti jáne avtostoppen júretin adamdardy tekserýge kóp kóńil bólindi», – dep tolyqtyrdy polıtsııa.
