Bir táýlik buryn sýǵa ketken 6 adamnyń deneleri tabyldy - QR TJM
ASTANA. 26 maýsym. QazAqparat - Bir táýlik buryn sýǵa batyp ketken 6 adamnyń deneleri tabyldy, dep habarlady QR TJM-niń baspasóz qyzmetinen.
Dúısenbi kúni Aqmola oblysy, Jańajol aýylynyń aýmaǵyndaǵy Nura ózenine 24 maýsym kúni batyp ketken 20 jastaǵy er adamnyń denesi tabyldy. Onyń máıiti QR TJM «Ortalyq aımaqtyq aeromobıldi jedel-qutqarý jasaǵy» MM qyzmetiniń 4 adamy men 1 tehnıkasynyń kómegimen shyǵaryldy.
Qapshaǵaı qalasynda QR TJM Almaty oblystyq TJD sýdan-qutqarý qyzmetiniń (7 adam men 1 tehnıka) kúshimen bir kún buryn qalalyq saıajaıda sýǵa batyp ketken 15 jasar qyzdyń denesi shyǵaryldy.
Shyǵys Qazaqstan oblysyndaǵy Asýbulaq kentiniń janynda ornalasqan Taıynty ózenine 24 maýsym kúni shomylý barysynda sýǵa ketken 7 jasar balanyń denesi tabyldy. Onyń múrdesin sýdan jergilikti turǵyndar alyp shyqty.
Sol kúni Jambyl oblysyna qarasty Belbasar aýylynyń aýmaǵyndaǵy Shý ózeninen bir táýlik buryn batyp ketken 20 jastaǵy jigittiń denesi shyǵaryldy. Jumystarǵa QR TJM Jambyl oblystyq TJD sýdan-qutqarý qyzmetiniń 4 adamy men 1 tehnıkasy jumyldyryldy.
Dúısenbi, 25 maýsym kúni Pavlodar oblysy Ertis kentindegi Ertis ózeninde 24 maýsym kúni mert bolǵan 15 jasar bozbalanyń denesi jer betine shyǵaryldy. Oǵan QR TJM Pavlodar oblystyq TJD sýdan-qutqarý qyzmetiniń 3 adamy men 1 tehnıkasy qatysty.
Sondaı-aq 25 maýsymda Pavlodar oblysyna qarasty Isa Baızaqov aýdanyndaǵy Ertis ózeninde 8 jasar balanyń denesi tabyldy.
