Bir soqqymen adam óltirgen rýdnyılyq kıkbokser 8 jylǵa sottaldy
QOSTANAI. QazAqparat - Qostanaı oblysy Rýdnyı qalasynyń turǵyny 21 jastaǵy Dmıtrıı Dıadıýndy óltirdi degen aıyppen, óńirge belgili kıkboksshy Dııar Qojaqovqa qatysty sot úkim shyqty, dep habarlaıdy «QazAqparat» HAA tilshisi.
Sot sheshimine sáıkes Dııar Qojaqov 8 jyl bas bostandyǵynan aıyryldy. Ol óz jazasyn qaýiptiligi ortasha túzetý mekemesinde óteıtin bolady. Sot úkim oqylǵan soń aıyptalýshyny birden zaldan alyp ketti, al qorǵaýshylar sot sheshimimen kelispeıtindikterin aıtady.
Sonymen qatar sýdıa moraldyq ótemaqy tóleý týraly shaǵymdy da qanaǵattandyrdy. Dıýdıýnnyń týystary 5 mln teńge ótemaqy talap etken bolatyn. Alaıda Qojaqov 1 mln teńge tóleýge mindetteldi.
Esterińizge sala keteıik, oqıǵa 19 tamyz kúni Rýdnyıdaǵy qala kúni merekesinde bolǵan. Sot materıaldaryna sáıkes, jas jigitterdiń arasynda kıkiljiń týǵan. Qostanaı oblystyq kıkboksıng quramasynyń kapıtany Dıar Qojaqov Dmıtrıı Dıadıýndy sol qolymen oń jaq shyqshyttan urǵan. Dıadıýn jabyq bas súıek-mı jaraqatyn alyp dárigerler kómegine júginedi. Alaıda ony eki saǵattan keıin aýrýhanadan úıine jibere salady.
Birneshe saǵattan keıin Dıadıýnnyń jaǵdaıy aýyrlap qaıtadan aýrýhana jetkiziledi. 2017 jyldyń 23 tamyzynda ol aýrýhanada kóz jumdy.
